Ísland er líklegra til að verða fyrir netárásum en mörg önnur lönd

Ísland er líklegra til að verða fyrir netárásum en mörg önnur lönd. Þetta segir sérfræðingur í tölvuöryggismálum sem stödd er hér á landi. Hún segir mikinn skort á sérfræðingum í tölvuöryggismálum.

Tölvuárásir voru gerðar víðsvegar um heim fyrr í þessum mánuði og var hugbúnaður notaður til þess að taka þúsundir tölva í gíslinu. Árásirnar höfðu áhrif á líf þúsunda.

Paula Januszkiewicz er einn helsti sérfræðingur í heimi í tölvuöryggismálum. Hún starfar um allan heim við ráðgjöf og fræðslu til fyrirtækja, stofnana og ríkisstjórna á sviði tölvuöryggismála. Þá starfar hún sem ráðgjafi hjá Microsoft.

Að undanförnu hefur hún, í samstarfi við Promennt á Íslandi,  séð um fræðslu um tölvuöryggi fyrir íslensk fyrirtæki. Paula segir að það sé áhyggjuefni hvað fáir séu sérhæfðir í töluöryggismálum í heiminum í dag.

„Það er mikill skortur á hæfileikafólki því okkur vantar sérfræðinga til að starfa hjá fyrirtækjum. Financial Times segir að við þurfum um 6 milljón öryggissérfræðinga fyrir 2019. Miðað við þá menntastefnu sem er við lýði um þessar mundir sjáum við að nauðsynlegt er að við menntum okkur í Netöryggi. Árið 2019 munum við hafa 4,5 milljón sérfræðinga. Okkur skortir því 1,5 milljón fótgönguliða,“ segir Paula.

Paula segir að tölvuárásir séu að verða algengari. Það þurfi að bregðast við, ekki síst á Íslandi. „Það er jafnvel líklegra að Ísland verði fyrir árás Netglæpamanna en aðrir og það er einföld skýring á því. Landið ykkar er ekki eitt það fátækasta í heiminum. Því er vilji til að greiða lausnargjald fyrir gögn sem verða dulkóðuð. Efnað fólk er líklegra til að greiða fyrir að fá gögnin sín til baka.“

Mikilvægt sé að fyrirtæki sjái til þess að starfsfólk á þessu sviði sé með næga þekkingu á öryggismálum. „Þá verða menn viðbúnari hugsanlegri árárs á fyrirtæki.Þannig berjumst við gegn þessu.Við verðum að vera meðvituð um það sem getur gerst svo við getum gripið til nauðsynlegra ráðstafana til að verjast ógn.“