De Gea næst bestur á eftir Schmeichel: „Hann er eins og karakter úr The Matrix“

David De Gea, markvörður Manchester United, fór hamförum á Emirates-vellinum á laugardaginn þegar að United vann mikilvægan 3-1 sigur á Arsenal og hélt sér á lífi í titilbaráttunni gegn Manchester City.

Spænski markvörðurinn varði fjórtán skot, þar af nokkur með miklum tilþrifum, en hann var gjörsamlega magnaður í leiknum. De Gea hefur undanfarin ár verið besti markvörður deildarinnar og virðist bara verða betri.

„Ég verð að viðurkenna að ég hafði rangt fyrir mér þegar að hann kom í úrvalsdeildina. Ég man bara eftir þessum granna 20 ára gamla strák sem leit út fyrir að vera í of stórum búning. Ég trúði ekki að hann væri nógu sterkur fyrir úrvalsdeildina,“ segir Jamie Redknapp, fyrrverandi landsliðsmaður Englands.

„Hann hefur síðan þá látið alla sérfræðinga éta orð sín. Ég held ég hafi aldrei séð neinn betri á milli stanganna en David De Gea. Hann er eins og karakter úr The Matrix. Það er eins og hann hægi á boltanum áður en hann ver skotin.“

Aðspurður hvar De Gea standi nú á meðal þeirra bestu í sögu ensku úrvalsdeildarinnar segir Redknapp hann vera í öðru sæti.

„Hann er næst bestur á eftir Peter Schmeichel. Schmeichel var svakalegur. Skipti eftir skipti komust menn einir á móti honum og áttu kannski gott skot og héldu að þeir væru að fara að skora en þá varði hann á ótrúlegan hátt,“ segir Jamie Redknapp.