Polanski tjáði sig um nauðgunarmálið: „Hvað varðar það sem ég gerði, því er lokið og ég gekkst við sök“

Pólski leikstjórinn Roman Polanski tjáði sig um nauðgunardóminn, sem hann hlaut í Bandaríkjunum fyrir fjörutíu árum, á kvikmyndahátíðinni í Zurich í Sviss fyrr í dag.

Polanski var handtekinn og sakaður um að nauðga hinni þrettán ára gömlu Samantha Geimer árið 1977. Polanski gekkst við því að hafa haft samræði við barn undir lögaldri, en flúði til Parísar í Frakklandi þegar hann fékk upplýsingar um það að dómarinn í málinu íhugaði að dæma hann til fimmtíu ára fangelsisvistar.

„Eins og þið vitið, þá hefur Samantha Geimer farið fram á að þessu máli verði í lokið í rúmlega 30 ár. En mér þykir fyrir því að dómararnir sem hafa verið með málið á sínum höndum í fjörutíu ár séu spilltir og verndi hvorn annan. Kannski kemur að því að einn þeirra hætti því,“ sagði Polanski við The Hollywood Reporter.

„Hvað varðar það sem ég gerði, því er lokið og ég gekkst við sök. Ég fór í fangelsi. Ég fór aftur til Bandaríkjanna til að sitja af mér. Fólk gleymir því, eða veit ekki af því,“ sagði Polanski og segist hafa setið mun lengur í fangelsi en honum var lofað þegar hann gekkst við brotinu.

Í janúar síðastliðnum bárust fréttir af því að Polanski hefði ákveðið að stíga til hliðar sem formaður dómnefndar César-verðlaunahátíðarinnar í Frakklandi vegna boðaðra mótmæla sem áttu að beinast gegn veru hans þar.

Polanski hefur farið fram á að málinu verði lokið í Bandaríkjunum og dæmt í því án þess að hann verði viðstaddur réttarhöldin.

Tvær konur til viðbótar hafa sakað hann um kynferðisbrot, en nýlegasta dæmið er kona sem steig fram í ágúst síðastliðnum og sagðist ætla að bera vitni ef réttað yrði aftur yfir Polanski vegna Geimer-málsins.