Tálbeitur áttu að upplýsa um fjárdrátt vaktstjóra sem fær milljónir í bætur

Fyrrverandi vaktstjóri á Hótel Marina við Mýrargötu fær tvær milljónir í miskabætur eftir að Héraðsdómur Reykjavíkur dæmdu honum í hag í gær í máli hans gegn eigenda hótelsins. Honum var sagt upp störfum fyrir þremur mánuðum eftir að grunur lék á að hann hefði dregið sér fé. Tálbeitur voru notaðar til þess að reyna að standa vakstjórann að verki.

Fyrst var greint frá málinu í kvöldfréttum Stöðvar 2 árið 2013. Þar kom fram að lögregla væri að rannsaka meintan fjárdrátt mannsins sem grunaður var um að draga sér fé eftir að yfirmenn hótelsins höfðu tekið eftir mikilli rýrnun á þeim vöktum sem hann hafði forráð yfir og uppgjör í sölukerfinu stóðust ekki.

Í dómi héraðsdóms kemur fram að yfirmenn á hótelinu hafi ákveðið að fá tálbeitur til þess að sjá hvort að vaktstjórinn væri í raun og veru að draga sér fé. Í því skyni fengu tálbeiturnar samtals 80 þúsund krónur í fimm þúsund króna seðlum til þess að versla hjá vakstjóranum. Höfðu yfirmenn skráð hjá sér raðnúmer seðlana svo kanna mætti hvort að seðlarnir skiluðu sér á réttan stað.

Fylgst var með aðgerðunum í gegnum öryggismyndavélar auk þess sem að fylgst var með færslum í sjóðsvélum. Viðstaddir voru hótelstjóri hótelsins og öryggisfulltrúi Flugleiðahótela, eiganda hótelsins. Við eftirlitið töldu þeir sig sjá vaktstjórann taka við umræddum peningaseðlum auk þess sem að viðkomandi reikningar væru stimplaðir út úr sölukerfinu.

Eftir lokun þann 10. ágúst var vaktstjórinn kallaður á fund á kaffistofu starfsmanna þar sem hótelstjórinn sakaði hann um að hafa tekið fjármuni í eigu hótelsins. Hafnaði vaktstjórinn því alfarið. Var lögregla kölluð á staðinn en við athugun á uppgjörum fundust peningaseðlarnir ekki. Tekin var skýrsla af vakstjóranum og leitað á honum og í fataskáp hans sem og í bifreið. Peningaseðlarnir fundust ekki þar.

Var vaktstjórinn rekinn vegna brota á trúnaðar- og starfsskyldum sínum og gruns um refsiverða háttsemi en í lögregluskýrslu kemur fram að hann hafi verið grunaður um að draga sér tvær milljónir í peningum. Var hann kærður til lögreglu en tveimur árum síðar var málið fellt niður af Lögreglustjóra af þeim ástæðum að ekki væri hægt að sjá af myndbandsupptökum að vaktstjórinn hefði slegið eign sinni á fjármuni staðarins og ennfremur að ekki sé með nokkru móti hægt að fullyrða að enginn annar starfsmaður á staðnum hafi ekki getað slegið eign sinni á fjármunina.

Vaktstjórinn krafði hótelið um miskabætur vegna málsins. Komst héraðsdómur að þeirri niðurstöðu í gær að hótelinu bæri að greiða honum tvær milljónir vegna tilhæfulausrar brottvikningar úr starfi. Í dóminum kemur fram að þær sakir þær sakir sem forsvarsmenn hótelsins hafi borið á hann hafi falið í sér ólögmæta og stórfellda meingerð gegn persónu hans og æru og valdið honum miska.

Þó hafnaði héraðsdómur þeirri kröfu mannsins að Hótel Marína bæri að greiað honum miskabætur vegna umfjöllun fjölmiðla um málið. Flugleiðahótel þarf að greiða manninum tvær milljónir í miskabætur, auk rúmlega milljón króna í laun sem hann ætti rétt á vegna fyrirvaralausrar uppsagnar. Þá þurfa flugleiðahótel að greiða tvær milljónir í málskostnað.

Dóm héraðsdóms má sjá hér.