Illugi Gunnarsson, mennta- og menningarmálaráðherra, hyggst leggja fram þingsályktunartillögu um að stofnuð verði þverpólitísk nefnd um málefni fjölmiðla. 

Nefndinni er ætlað að skila tillögum til ríkisstjórnarinnar í febrúar á næsta ári um til hvaða breytinga er nauðsynlegt að grípa til að mæta þróun í fjölmiðlaumhverfi. Þetta kom fram í sérstakri umræðu um rekstrarumhverfi fjölmiðla á Alþingi í dag. 

Helgi Hjörvar, þingflokksformaður Samfylkingarinnar, var málshefjandi og sagði það grundvallaratriði að rekstrarumhverfi fjölmiðla væru almennt góð. 

„Það er þess vegna áhyggjuefni ef afkoma þar er léleg, tap viðvarandi hjá fjölda fyrirtækja, ef laun þar eru orðin léleg, starfsaldur stuttur, starfsöryggi lítið og fyrirtækin háðari eigendum sínum og auglýsendum en góðu hófi gegnir,“ sagði Helgi.

Vandinn ekki séríslenskur

Hann benti á að vandinn væri ekki séríslenskur heldur að hann væri fylgifiskur hraðra tækniþróana og þess að erlend stórfyrirtæki líkt og Google og Facebook fái miklar auglýsingatekjur og borgi ekki skatt hér á landi. 

„Ætlum við að skattleggja harðar og meira fyrirtæki á netinu sem eru að reyna að halda úti íslensku efni, heldur en við treystum okkur til að skattleggja erlendu risana?“ spurði Helgi.

Helgi benti á að vilji neytenda til að borga fyrir efni færi minnkandi og spurði hvort að þrengja ætti að fjölmiðlum eða að grípa til ráðstafana. 

Illugi Gunnarsson, mennta- og menningarmálaráðherra svaraði fyrirspurn Helga og sagði mikilvægt að fjölmiðlar séu öflugir og geti sinnt starfi sínu vel. 

Illugi sagðist hafa kallað forystufólk ljósvakamiðla á sinn fund í sumar, þar sem farið var yfir rekstrarumhverfi miðlanna. Í kjölfarið átti hann einnig fund með fjármálaráðherra og forsætisráðherra um málefni fjölmiðla.