Hallbera: Verðum að sætta okkur við að vinna riðilinn

Hallbera Guðný Gísladóttir, vinstri bakvörður Íslands, segir að liðið verði bara að sætta sig við að hafa unnið riðilinn og að liðið geti vel við unað, þrátt fyrir tap gegn Skotum á Laugardalsvelli í kvöld, 1-2.

„Maður er drullufúll, en það tekur nokkrar mínútur og við verðum að hugsa bara um að við unnum þennan riðil og erum með frábæra markatölu,” sagði Hallbera við Vísi í leikslok.

„Auðvitað er leiðinlegt að tapa hér í kvöld. Mér fannst við ekki mæta nægilega grimmar í fyrri hálfleik og þær keyrðu yfir okkur á fyrstu 30 mínútunum. Það er ekkert í boði hjá okkur.”

„Ég er ánægð með hvernig við komum út í síðari hálfleikinn og mér fannst við vera betri aðilinn. Mér fannst við óheppnar að fá á okkur þetta víti.”

Það var ekki sjón að sjá íslenska liðið í fyrri hálfleik, en það lenti í vandræðum með öll grunnatriði leiksins; senda boltann, hreyfa sig og vinna varnarleikinn sem ein heild.

„Ég hef engin svör hvað var í gangi í fyrri hálfleik. Við vorum að þröngva boltanum upp í svæði sem voru bara lokuð, en þegar við slökuðum á og spiluðum boltanum eins og við höfum verið að gera þá fannst mér þær ekki ógna okkur mikið.”

„Miðað við hvernig seinni hálfleikurinn spilaðist, þær fengu einhver færi, en mér fannst við vera betra liðið í síðari hálfleik. Það hefði verið frabært að ná allaveganna jafntefli, en við verðum að sætta okkur við að vinna riðilinn og ég held við getum gert það.”

Annan leikinn í röð mættu rúmlega sex þúsund manns á leik kvennalandsliðsins og var áhorfendameitð í hættu annan leikinn í röð, en ekki féll það. Hallbera var ánægð með mætinguna.

„Það er bara frábært hversu mikið fólk hefur verið að styðja okkur og mér fannst við setja standard á það hvernig landsliðið megi búast við að það verði hér á heimavelli. Þetta er bara magnað að fá að taka þátt í þessu og maður er þaklátur öllum þeim sem komu,” sagði Hallbera að lokum.