Fær hugmyndir að glæpasögum í baði

„Ég byrjaði að fikta við þetta árið 2014, í janúar – þá var frekar lítið að gera hjá mér í vinnunni og ég var búinn að lesa allar jólabækurnar. Þá byrjaði þetta æfingatímabil eins og ég kalla það, maður þarf að skrifa og skrifa til að komast í gírinn. Ég var farinn að fá alls konar hugmyndir í lestinni á leiðinni í vinnuna og það var fyrir svona ári sem ég lét vaða og byrjaði að skrifa þessa bók,“ segir Magnús Þór Helgason tölvunarfræðingur sem sendi á dögunum frá sér sína fyrstu skáldsögu, spennusögu sem ber titilinn Bráð.

„Bókin fjallar um Svein sem er sænsk-íslenskur jarðfræðingur og stundar jarðfræðirannsóknir á Skarðsheiði. Þessi huggulega sveitadvöl hans breytist fljótlega í atburðarás sem ætlar engan enda að taka. Hann er fljótlega grunaður um morð sem er framið og þar sem lögreglan sinnir starfi sínu ekki sem skyldi verður Sveinn að afla sönnunargagna sjálfur.

Við fáum að fylgjast með Sveini í gegnum þessa ferð hans. Í sögunni fléttast saman þessar skemmtilegu andstæður þar sem þú ert með þessa fallegu sveita­rómantík þar sem allir eru góðir og hjálpsamir en síðan verður þessi hræðilegi atburður – mér fannst mjög gaman að stilla upp þessum andstæðum,“ segir Magnús sem þurfti að endurhugsa nýtingu sína á öllum dauðum tíma til að takast að klára bókina.

„Ég er fjölskyldumaður, á þrjú börn og hef ekki mikinn tíma. Ég hef notað tímann í lestinni mikið í þetta. Þetta er klukkutími í hvora átt, en ég reyni yfirleitt að nota tímann til að vinna, en þegar ég hef lausan tíma þá gríp ég í skrifin. Þetta getur verið allt að klukkutími á dag bara í lestinni. Síðan er það líka að á kvöldin þegar börnin eru sofnuð hef ég minnkað símanotkun mína, maður var farinn að hanga svolítið í símanum. Ég skipti öllum svona dauðum tíma út fyrir skrifin og get þannig sinnt þessu meira en ég bjóst við að geta.

Svo hef ég lagst í bað þegar það er laus stund – þann tíma nota ég til að hugsa út plott og karaktera. Þar fæ ég flestar hugmyndirnar. Það hefur meira að segja gengið svo langt heima hjá mér að við höfum stundum kallað þetta skáldbað. Ég gleymi oft að taka með mér pappír og penna og þarf að rjúka upp úr baðinu til að koma hugmyndunum á blað. Sumir hafa reyndar grínast með að kalla þetta hryllingsbað,“ segir Magnús sem nýtir greinilega tímann sinn í baði til að hugsa upp morð og annað það sem skrifað er um í spennusögum.