Býður í partí og hlífir við samsöng og ræðuhöldum

Í tilefni dagsins ætla ég að bjóða bestu vinum mínum í partí,“ segir Þorri Hringsson mynd­listar­maður og skellihlær en hann stendur heldur betur á tímamótum í dag – hann heldur nefnilega upp á hálfrar aldar afmælið sitt og mun efna til veislu af því tilefni í kvöld.

„Þetta verður veisla fyrir ættingja og vini og vonandi einhver góð vín með. Það verða nú ekki 400 manns – en það verður gott „seleksjón“ af fólki. Segjum að þetta verði nær fimmtíu manns svo ég sé ekki að ýkja neitt hérna.“

En skyldi Þorri vera mikið afmælisbarn?

„Nei,“ segir Þorri harðákveðinn, „þetta er nefnilega bara í annað skipti sem ég held upp á afmælið síðan ég komst á fullorðinsár. Síðast var það fyrir tuttugu árum svo það var mikil pressa á mér að halda upp á þetta í ár. Það þurfti svolítið að ýta á mig svo ég segði já, en það hafðist að lokum – og ég sé ekki eftir því. Þetta verður stuð, ég lofa því. Ég er búinn að hafa gott fólk með mér að skipuleggja afmælið – þetta eru ekki margir vinnudagar sem hafa farið í skipulagningu.“

Þannig að þá má gefa sér að það verði kannski ekkert sérstaklega mörg skemmtiatriði í boði í kvöld?

„Ég ætla að hlífa gestum mínum við öllum ræðuhöldum og samsöng, það er svona það eina sem ég ákvað að ég myndi ekki bjóða upp á – en það verða kannski spiluð nokkur góð eitíslög í staðinn.“

Þorri stendur núna í ströngu við að henda upp yfirlitssýningunni Kæj! Myndasögur í aldarfjórðung en hún verður opnuð í byrjun næsta mánaðar, 7. október, í myndasögudeild menningarhússins í Grófinni. Þar sýnir Þorri myndasögurnar sínar en í þeim geira hefur hann átt langan og farsælan feril samhliða myndlistinni. Meðal þess sem Þorri hefur verið að bardúsa í myndasöguheiminum er bókin 1937 – Ævintýri Tinnu og Hreins Borgfjörð en hann gaf hana út í samvinnu við skáldið Sjón árið 1989. Einnig hefur hann verið duglegur að birta myndasögur í GISP! – raunar hefur hann verið með sögu í hverju einasta tölublaði síðan það hóf göngu sína árið 1990.

„Sýningin verður opnuð fyrstu helgina í október og ég hef verið að undir­búa það í vikunni. Þetta verður sögulegt yfirlit yfir myndasögurnar mínar. Síðan fer ég að undirbúa næstu sýningu sem verður málverkasýning og haldin næsta vor hérna í Reykjavík. Það er alltaf nóg að gera – þegar maður vinnur fyrir sjálfan sig þá er enginn sem segir manni hvað á að gera – maður verður bara að gera það,“ segir Þorri að lokum og það má svo sannarlega segja að það séu orð að sönnu.