Komu saman til að mótmæla brottvísunum flóttamanna

Nokkur fjöldi manna kom saman við innanríkisráðuneytið fyrr í dag til að mótmæla yfirvofandi brottvísunum flóttamanna úr landi. Samtökin No Borders Iceland boðaði til mótmælanna.

Í tilkynningu frá No Borders kemur fram að þess sé krafist að brottvísunum verði hætt og að flóttamönnum verði gert mögulegt að setjast að hér á landi.

„Á morgun stendur til að vísa tveimur Sýrlendingum, Wajde og Ahmad, úr landi og aftur til Búlgaríu. Þann 16. mars á að vísa Dega fjölskyldunni frá Albaníu úr landi. Mun fleiri flóttamenn eiga yfir höfði sér brottvísanir á næstu vikum, eða að minnsta kosti um 15 manns. Aðstæður í Búlgaríu eru verri en á Ítalíu, Grikklandi og Ungverjalandi, sem Ólöf Nordal sagði sjálf að væru ómannúðlegar aðstæður. Samt skal senda þá aftur til Búlgaríu og ekkert lát virðist á brottvísunum til landa þar sem aðstæður eru jafn slæmar.

Sögur þessa fólks sem bíða brottvísunar eru mismunandi en þau eiga það sameiginlegt að falla ekki inn í kerfið. Ef fingraför þeirra hafa verið tekin einhvers staðar á leiðinni eru þau föst þar, sama hvort þeim líkar betur eða verr. Ef upprunaland þeirra er skilgreint sem „öruggt“, burtséð frá þeirra persónulegu aðstæðum, þá verður þeim vísað burt. Það að þau vilji búa hér, séu komin með vinnu, hafi lært íslensku og eignast vini, skiptir ekki neinu máli. Það að það sárvanti fólk til að vinna hér, skiptir heldur engu máli. Útlendingalögin eru skrifuð til að halda fólki úti, ekki til að gefa þeim færi á að flytja hingað.

Á meðan ástand mála er með óbreyttum hætti í Evrópu er óásættanlegt að Ísland haldi áfram brottvísunum aftur til þangað. Það er kominn tími á að breyta lögunum og taka upp mannúðlegri nálgun í þessum málum. Það er kominn tími til að hætta brottvísunum og finna leiðir til að leyfa fólki að búa hér,“ segir í tilkynningunni.