Segir það óásættanlegt ef samgönguáætlun fari ekki í gegn á þessu þingi

Enn er beðið eftir því að endurskoðun samgönguáætlunar komist á dagskrá þingsins en hún liggur nú fyrir til umsagnar. Björn Ingimarsson, bæjarstjóri Fljótsdalshéraðs, segir algjörlega óásættanlegt ef áætlunin fari ekki í gegn á þessu þingi en hún hefur verið ósamþykkt síðustu tvö misseri.

Samkvæmt fyrirliggjandi áætlun mun Austurland frá minnstan hluta þess fjármagns sem úthlutað verður í samgöngumál næstu árum en bæjarstjóri Fljótsdalshéraðs vonast eftir að litið verði betur til þessa landshluta til þess að tengja byggðirnar betur saman. Um 150 til 200 kílómetrar af tengivegum eru með óbundnu slitlagi.

„Það er mjög hátt hlutfall þannig. Það segir sig sjálft að með því viðhaldsfé sem er til Vegagerðarinnar – eins og þetta hefur verið rekið undanfarin ár – þá er ástandið á þessu afar slæmt. Það er ekkert flókið að benda hér á staði sem er löngu orðið tímabært að taka á, eins og til dæmis Lagarfljótsbrúin.“

Líta til fleiri þátta en Þjóðvegar 1

Björn segir að líta beri til fleiri þátta en Þjóðvegar 1 og vill varanlegri lausn milli byggða á Austurlandi. „Við þurfum að gera betur og það sem við höfum verið að horfa til er að hér komi göng undir Fjarðarheiðina sem tengi Fljótsdalshérað og Seyðisfjörð.“

Innanríkisráðherra hefur sagt að til þess að koma vegaframkvæmdum og vegauppbyggingu í ásættanlegt horf þurfi að horfa til einkaframkvæmda.

Björn segist ekki alveg viss um hvort menn geti rökstutt göng undir Fjaðarheiðina sem einkaframkvæmd. „Ég ætla ekki að mæla gegn því ef menn telja að það sé skynsamlegt. Ég hef ákveðnar efasemdir um réttmæti einkaframkvæmdar í þessu tilviki.“

Vill niðurgreiðslu í flugsamgöngum

Björn segir að eðlilegt væri að yfirvöld gerðu úttekt á samgöngumálum milli byggða á landsvísu og myndu leggja meiri áherslu á að byggja upp samgöngur svo fólk geti með auðveldu móti sótt þjónustu á höfuðborgarsvæðið, til dæmis með niðurgreiðslu í flugsamgöngum.

„Það er eðlilegt að horfa til niðurgreiðslna, það er að fara í almenningssamgönguáherslur í þessu sambandi, eins og gert er víða í Evrópu, þannig að hinn almenni íbúi geti nýtt þennan ferðamáta. Eins og verðlagning á þessu er í dag þá er þetta ekki fyrir hinn almenna íbúa. Það sem ég legg mesta áherslu á er það að menn samþykki samgönguáætlun. Hún er ósamþykkt og það er eitthvað sem er algerlega óásættanlegt,“ seir Björn.