Kristján Möller: Kosningalykt af hugmyndum innanríkisráðherra um úrbætur í samgöngumálum

Fyrrverandi samgönguráðherra Samfylkingarinnar tekur undir með núverandi innanríkisráðherra um að ekki verði komist hjá því að tvöfalda hringveginn. Innanríkisráðherra segir fjölgun ferðamanna og aukna umferð um þjóðvegi landsins hafa leitt til þess að vegir séu víða um land komnir að þolmörkum og því afar brýnt að mörkuð verði stefna í þessum málum.

Í viðtali við Morgunblaðið í dag segir Ólöf Nordal innanríkisráðherra að uppbygging vegakerfisins og önnur verkefni ríkisins séu það umfangsmikil að skatttekjur muni ekki koma til með að duga fyrir öllum nauðsynlegum vegaframkvæmdum á stuttum tíma og því verði að líta til einkafjármögnunar.

Ólöf segir samgöngukerfið hafa það fram yfir margt annað og að þar sé hægt að blanda saman skattfé og einkafjármögnun, með samvinnu ríkisins og einkaframtaks. Rétt sé að líta til þessa til að ná fram auknu hagræði fyrir skattgreiðendur, eins og ráðherrann orðar það. Hugmyndin um lagningu Sundabrautar sé gott dæmi um þetta.

Segir Ólöfu dusta rykið af gömlum hugmyndum

Kristján L. Möller þingmaður Samfylkingarinnar og fyrrverandi samgönguráðherra segir að ráðherra sé að dusta rykið af gömlum hugmyndum og að það sé merkilegt að ráðherra skuli koma með þessar hugmyndir þegar svo stutt sé til kosninga. Hingað til hafi þessi málaflokkur verið sveltur í tíð núverandi ríkisstjórnar.

„Þetta hefur verið skoðað áður og í minni tíð sem samgönguráðherra var þetta komið ansi langt með helstu leiðirnar út úr Reykjavík með tvöföldun. En það ber auðvitað að hafa í huga að í tíð þessarar ríkisstjórnar hafa verið sögulega lítil framlög til samgöngumála og vegaframkvæmda og get ekki annað en minnt líka á það að ennþá eru margir landshlutar með vonlaust vegakerfi, eins og á sunnanverðum Vestfjörðum, norðausturhorninu og fleiri stöðum þar sem á hreinlega eftir að byggja upp vegina. Fyrst og fremst myndi ég herja á innanríkisráðherra varðandi það að fá meiri framlög úr ríkissjóði til samgöngumála og þá er hægt að gera stórátak,“ segir Kristján.

Kristján segir að hann hafi alltaf verið þeirrar hugmyndar að skoða þá leið að uppbygging og vegaframkvæmdir verði gerðar í gegnum einkaframkvæmd.

Vaxtastigið í landinu getur eyðilagt hugmyndir um einkaframkvæmd

„Það ber líka að hafa í huga það sem getur eyðilagt svona hugmyndir um einkaframkvæmd, það er í raun og veru bara vaxtastigið í landinu og allt að því vaxtaokur og síðan var það líka að þetta mætti mikilli andstöðu hjá sveitarstjórnarmönnum á þeim stöðum sem þetta var. En þetta eru sem sagt hugmyndir sem hafa verið skoðaðar alllengi í samgönguáætlun. Við ætluðum að gera þetta á erfiðleikatímanum, meðal annars til að skapa vinnu. Þetta var tekið fram í stöðugleikasamkomulagi ríkisstjórnarinnar og aðila vinnumarkaðarins. Eina sem gert var voru Vaðlaheiðargöng og þess ber að geta að við lendum í vandræðum með þau og með fjármögnun og þar voru fyrst og fremst vextirnir sem spiluðu stóran þátt í því.“

Kristján segir að best væri að notast við nútíma tækni til að innheimta veggjöld eins og gert er erlendis og að afnema ætti olíu- og bensíngjald. Jafnframt undrast hann að þessar tillögur innanríkisráðherra séu fyrst að koma fram núna þegar svona stutt er til kosninga.

„Það er nú töluverð kosningalykt af þessu eins og ýmsu fleiru sem þessi ríkisstjórn ætlar að gera núna á seinustu metrunum. Framlög til samgöngumála hafa aldrei verið eins lítil eins og í tíð þessarar ríkisstjórnar,“ segir Kristján.