Heimili Prince verður gert að safni

Heimili poppsöngvarans Prince við Paisly Park í Minneapolis verður opnað almenningi í október. Fjármálafyrirtækið sem hefur umsjón með húsnæðinu samdi við ættingja hans sem í sameiningu ætla að opna þar safn til minningar um ævistarf popparans.

Tyka Nelson, systir popparans segir að þetta hafi ávallt verið ósk bróðir síns.

Opnunin verður sex mánuðum eftir að Prince fannst látinn í lyftu húsnæðisins. Hann lést af of stórum skammti verkalyfsins fentanyl. Rannsókn málsins hefur leitt í ljós að rangt lyf hafi verið í umbúðunum sem fundust heima hjá popparanum. Þar stóð að um lyfið hydrocodone hafi verið að ræða sem er mun veikara lyf en fentanyl.

Sama fyrirtækið og heldur utan um rekstur Graceland safnsins, sem opnað var á heimili Elvis Presley, um hafa umsjón með starfseminni á Paisly Park. Yfir 20 milljón manna hafa heimsótt Graceland frá því að Elvis dó árið 1977.

Aðgangur inn á safnið mun kosta tæpar 6 þúsund krónur.