Einn ríkasti maður Bretlands látinn

Gerald Cavendish Grosvenor, betur þekktur sem hertoginn af Westminster, lést skyndilega í gær eftir veikindi á konunglega Preston-sjúkrahúsinu í Lancashire, 64 ára að aldri. Var hann einn ríkasti maður Bretlands og náinn vinur Karls Bretaprins.

Auður hertogans var metinn á 9,4 milljarða punda, um 1.300 milljarða íslenskra króna samkvæmt lista Sunday Times yfir ríkustu einstaklinga Bretlands og var hann þá talinn sjötti ríkasti maður Bretlands.

Hertoginn hafði hagnast gríðarlega á eignum sínum í miðbæ Lundúna þar sem félag hans átti mikið af eignum, bæði íbúðum sem og verslunarplássi. Þá átti hann miklar eignir á Skotlandi og á Spáni.

Hann og Karl Bretaprins voru nánir vinir og var hann guðfaðir Vilhjálms Bretaprins. Þá er sonur hertogans guðfaðir Georgs Bretaprins, sonar Vilhjálms.