„Ég velti því stundum fyrir mér hvort það sé árið 1962 eða 2016“

Dmitry Medvedev, forsætisráðherra Rússlands, segir nýtt kalt stríð hafið, en með þessum orðum svarar hann evrópskum þjóðarleiðtogum sem hafa fordæmt loftárásir Rússa í Sýrlandi og komið þeim skilaboðum til Vladimir Pútín, Rússlandsforseta, að loftárásunum verði að linna svo friðarviðræður geti hafist í Sýrlandi.

Í ræðu sem Medvedev hélt á öryggisráðstefnu í Munchen mótmælti hann því að Rússar hefðu skotið á óbreytta borgara í Sýrlandi.

„Það eru engar sannanir fyrir því að við séum að skjóta á óbreytta borgara en samt eru allir að ásaka okkur um það. Rússland er ekki að reyna að ná fram einhverjum leynilegum markmiðum í Sýrlandi heldur erum við aðeins að gæta hagsmuna okkar,“ sagði Medvedev í ræðu sinni. Hann sagði nýtt kalt stríð hafið.

„Þeir búa meira að segja til bíómyndir þar sem Rússland byrjar kjarnorkustríð. Ég velti því stundum fyrir mér hvort það sé árið 1962 eða 2016.“

Jens Stoltenberg, framkvæmdastjóri NATO, gaf lítið fyrir orð Medvedev. Hann sagði orðræðu Rússa, beitingu herafla þeirra og æfingar með kjarnorkuvopn til þess fallnar að ógna nágrannaríkjum þeirra og grafa undan trausti og stöðugleika í Evrópu.