Síbrotamaður í gæsluvarðhald grunaður um fimm líkamsárásir

Hæstiréttur hefur staðfest gæsluvarðhaldsúrskurð Héraðsdóms Suðurlands yfir síbrotamanni sem meðal annars er grunaður um líkamsárás á skemmtistað í Vestmannaeyjum þann 12. mars síðastliðinn. Mun hann vera í gæsluvarðhaldi til

Í úrskurði héraðsdóms er fjöldi mála á hendur manninum sem lögregla hefur til rannsóknar rakinn. Eru þar tilgreindar fimm líkamsárásir, þrjár frá því seinasta sumar, ein frá því í janúar síðastliðnum og svo síðan nú í mars en þá á hann meðal annars að hafa stappað á höfði þess sem hann réðst á. Þá er hann jafnframt grunaður um nokkur fíkniefnalagabrot og tollalagabrot.

Að mati lögreglustjórans í Vestmannaeyjum, sem krafðist þess að maðurinn yrði vistaður í síbrotagæslu, er mögulegt að ljúka fyrrnefndum málum hratt og örugglega ef maðurinn sætir gæsluvarðhaldi á meðan þau eru til afgreidd.

„Nauðsynlegt sé að stöðva brotahrinu hans en hann hafi átt samfleytta brotahrinu líkamsárása frá því sumarið 2015. Af ofangreindum 11 brotum séu 5 líkamsárásir, þar af tvær sem varði við 1. mgr. 218. gr. alm. hgl. og tvö skallabrot. Tvö brot, líkamsárás annars vegar og hótun um líkamsmeiðingar hins vegar, beinist gegn [...] ára börnum og séu auk þess að vera hegningarlagabrot, brot á barnaverndarlögum. Þar líti ennfremur út að kærði sé með háttsemi sinni að reyna að hafa áhrif á vitni í máli sem þegar hafi verið þingfest,“ segir í úrskurði héraðsdóms.

Maðurinn er fæddur 1996 en á þrátt fyrir ungan aldur langan sakaferil að baki. Hann er í mikilli fíkniefnaneyslu, svo mikilli að haft er eftir móður hans í upplýsingaskýrslu lögreglu „að hún skilji hann ekki þegar hann talar vegna vímuástands, hann sé þvoglumæltur og í alvarlega annarlegu ástandi.“

Fyrir dómi fór maðurinn á fram á að hann yrði vistaður á sjúkrahúsi eða viðeigandi stofnun í stað gæsluvarðhalds.

Ekki var fallist á það þar sem „ekkert liggur fyrir um að kærði sé ófær um að sæta gæsluvarðhaldi í fangelsi og ekkert liggur fyrir um að hann geti fengið pláss á meðferðarstofnun, svo sem hann kveðst vilja,“ að því er segir í úrskurði héraðsdóms. Er honum því gert að sæta varðhaldi til 8. apríl eins og áður segir.