Færeyskur þungarokkari fengið sig fullsaddan af rangfærslum um grindhvalaveiðarnar

Myndband af útskýringum færeyska tónlistarmannsins Heri Joensen, sem hefur gert garðinn frægan með víkingarokksveitinni Týr, hefur vakið mikla athygli allt frá því að það rataði á vefinn fyrir helgi.

Í myndbandinu tekur Joensen upp hanskann fyrir grindhvalaveiðar Færeyingar sem lengi hafa verið umdeildur þáttur í sögu og menningu Færeyinga. Hljómsveit hans hafi til að mynda fengið að líða fyrir veiðarnar.

Myndbandið má sjá hér að neðan en um 150 þúsund manns hafa nú barið það augum.

„Nú er svo komið að hópur óupplýstra einstaklinga þrýstir á skipuleggjendur að bóka ekki hljómsveitina mína og slaufa tónleikum sem nú þegar hafa verið skipulagðir,“ segir rokkarinn sem heldur því fram að óheiðarleiki Paul Watson, stofnanda Sea Shepard-samtakanna sem sökkti til að mynda íslensku hvalveiðiskipunum Hval 6 og 7 árið 1986, leiki þar lykilhlutverk. 

Joensen segir að upphaf herferðarinnar gegn Týr megi rekja til ljósmyndar sem hann deildi á Facebook-síðu sinni. Þar mátti sjá tónlistarmanninn gera að grindhval en Joensen hefur tekið virkan þátt í veiðunum í gegnum árin.

„Þar sem 80 prósent heimsbyggðarinnar eru ekki grænmetisætur hélt ég að það væri í fínu lagi að deila myndinni, því mér finnst að fólk ætti að fá að sjá hvernig kjötvörur eru verkaðar. En í ljósi þess að fólk fær sárasjaldan að sjá hvað gerist á bakvið tjöldin í sláturhúsum er hálfgerður ævintýrabragur yfir kjötneyslunni. Fólk telur að húsdýr fari sjálfviljug til sársaukalausrar slátrunar og að óspillt náttúran sé látin óáreitt.“

Þrátt fyrir að hvalveiðar séu ólöglegar í ríkjum Evrópusambandsins þá á það ekki við um Færeyjar enda eru þær ekki aðildarríki sambandsins. „Því eiga alþjóðlegar tilskipanir ekki við um hvalveiðarnar okkar. Alþjóðahvalveiðiráðið tekur sérstaklega fram að það hlutist ekki til um veiðar frumbyggja á smáhvelum til manneldis, að öðru leyti en til að tryggja sjálfbærni,“ útskýrir Joensen.

Mannúðlegasta leiðin til að drepa hvali

Því næst greinir hann frá því hvernig sjálf veiðin fer fram, frá smölun til slátrunar sem mörgum gagnrýnendum hefur þótt harðneskjuleg. „Þetta eru stór dýr og því rennur auðvitað mikið blóð til sjávar. Þetta er kannski ógeðslegt á myndum en þetta er í raun engu verra en þú myndir sjá í hvaða sláturhúsi sem er. Þetta, ef marka má dýralækna, er þó mannúðlegasta leiðin til að drepa hvali,“ segir Joensen.

„Hvalir kunna að vera tiltölulega gáfuð dýr en það eru fjöldamörg önnur dýr, til að mynda svín, en þeim er slátrað án þess að það sé mikið siðferðislegt álitamál.

Hann bætir ennfremur við að þessi aðferð gerir hvölunum kleift að lifa sem lengt í þeirra náttúrulega umhverfi. Aðra sögu er þó að segja um húsdýr sem eru sérstaklega framleidd til þess eins að rata á matardiska víðsvegar á heiminn, með tilheyrandi kolefnisfótsporum.

Myndbandið af útskýringum Joensen má sjá hér að neðan.