Kattaeigendur í Hafnarfirði harmi slegnir

Grunur leikur á að eitrað hafi verið fyrir köttum í Hafnarfirði í síðustu viku en að minnsta kosti fjórir kettir hafa skyndilega drepist á þeim tíma en allir búa þeir á sama svæði. Eigendur kattanna eru harmi slegnir.

Þrír kettir voru lagðir inn á Dýraspítalann í Garðabæ í síðustu, mikið kvaldir. Enginn kattanna lifði af en starfsmenn dýraspítalans grunaði að frostlagareitrun hafi dregið kettina til dauða og benda fyrstu niðurstöður krufningar til að svo hafi verið.

Grunur leikur á að eitrað hafi verið fyrir köttunum en frostlögur er baneitraður og er eitrunin köttum mjög kvalafull.

„Það er greinilegt að það er einhverjum hérna í hverfinu mjög illa við ketti. Það eru fjórir eða sex á rúmlega viku og þetta er mjög sorglegt að það skuli vera einhver hérna sem er að gera svona ljótt,“ segir Hildur Þorsteinsdóttir, sem átti einn köttinn.

Sonja Thorberg var eigandi Frosta sem drapst en hún segir atvikið hafa tekið mjög á. „þetta er ótrúlega óþægilegt. Ég er með börn og maður veit ekkert hver getur lent í því að borða eitthvað upp úr götunni. Þetta veldur miklum áhyggjum,“ segir Sonja.

Edda Sigurðardóttir, átti köttinn Spike sem einnig drapst í síðustu viku. „Þetta er ógeðslegur dauðdagi. Mér er alveg sama hversu illa þér er  við dýr, þetta er það ógeðslegast sem þú getur gert einhverjum. Þau deyja hægt og þetta er mjög kvalafult. Hann byrjaði á því að kasta upp og klukkutímum seinna er hann komin með lömunareinkenni í lappirnar sem endar svo með því að hann á erfitt með að anda,“ segir Edda en Spike lifði ekki af.

„Þetta er skelfilegt. Eitt er ef þetta hefði verið slys en síðan bætast við fleiri kettir út vikuna,“ segir Edda.

Matvælastofnun rannsakar nú málið og hvetja Edda, Sonja og Hildur alla til að hafa augun opin og hafa samband við lögreglu sjái þeir matvæli sem mögulega hafi verið sett í frostlög í hverfinu.