Allir út úr húsi #útmeðþig

Við lifum á tækniöld og margar jákvæðar breytingar hafa átt sér stað á ýmsum sviðum, en að sama skapi hefur dregið verulega úr daglegri hreyfingu fólks. Fólk eyðir sífellt meiri tíma í alls kyns afþreyingarefni í snallsímum og tölvum og afleiðingin er sú að kyrrseta hefur aukist verulega. Fólk þarf að vera meðvitað um neikvæðar afleiðingar kyrrsetu og reyna eftir bestu getu að fylgja ráðleggingum um hreyfingu.

Enginn þarf að efast um gildi hreyfingar fyrir heilsuna. Margsannað er að aukin hreyfing minnkar líkur á alls kyns sjúkdómum og ótímabærum dauðsföllum ásamt því að bæta lífsgæði fólks og auka vellíðan.

Í ráðleggingum frá Embætti Landlæknis kemur fram að fullorðnir einstaklingar ættu að stunda miðlungserfiða hreyfingu í minnst 30 mínútur daglega. Börn og unglingar ættu að hreyfa sig í minnst 60 mínútur daglega. Hreyfingin ætti að vera bæði miðlungserfið og erfið.

Gerum hreyfingu að lífsstíl 

Ein einfaldasta leiðin til að auka hreyfingu í daglegu lífi er að velja ferðamáta sem felur í sér hreyfingu, svo sem að ganga eða hjóla. Með því má með einföldum hætti uppfylla lágmarksráðlegginar um hreyfingu og njóta þess ávinnings sem þeim fylgir. Stærstu vöðvar líkamans eru virkjaðir, hjartað fær þjálfun og orkunotkun eykst. Við öndum að okkur heilnæmara lofti og ekki síst spörum við kostnað fyrir heimilið og samfélagið í heild. Valið er okkar.

Hreyfum okkur í vinnu og skóla, nýtum náttúrna til hreyfingar, finnum okkur æfingafélaga og höfum æfingarnar fjölbreyttar. Með daglegri hreyfingu er meðal annars hægt að fækka veikindadögum, vernda stoðkerfið, skerpa athygli og auka afköst.

Verum virk að vetrarlagi

Nú þegar veturinn er genginn í garð upplifa sumir einstaklingar fleiri hindranir fyrir hreyfingu en á öðrum árstímum. Veðrið er aftur á móti sjaldan það slæmt að klæðnaður við hæfi sé ekki nægilega góð vörn. Börn eru klædd upp til að þola flest veður og það ætti ekki að vera vandamál fyrir okkur fullorðna fólkið að gera slíkt hið sama.

Leggjum áherslu á samverustundir í faðmi fjölskyldunnar. Hreyfum okkur í frítímanum með fjölskyldunni. Á þessum árstíma er tilvalið að skella sér í vasaljósagönguferð, fara út á sleða eða á skauta. Eins er fátt huggulegra en að sitja í heita pottinum eftir sundsprett á köldum vetrardegi.

Stöndum upp frá tölvuskjánum, reimum á okkur skóna og skellum okkur út í ferska loftið!

#útmeðþig

facebook.com/utmedthig