„Ég veit að ég get gert eitthvað í því“

„Maður horfir á þessi myndbönd og les þessar fréttir og maður fyllist einhvern veginn vanmætti. Maður finnur bara fyrir sorg og það er oft erfitt að horfa til enda.“ Þetta segir Árni Vilhjálmsson í nýjasta ákalli UNICEF vegna hrikalegs ástands í Nígeríu og nágrannaríkjum.

Hann segir einnig að upplýsingaflæðið sé orðið það mikið að auðvelt sé að fara úr einhverri hörmung yfir í að skoða nýja tónleika á sunnudaginn.

UNICEF á Íslandi hafa undanfarna daga staðið fyrir neyðarsöfnun vegna þeirra hörmunga sem eiga sér nú stað í Nígeríu og í nærrliggjandi löndum, þar sem um 150 börn deyja á degi hverjum vegna vannæringar.

Góð og mikil þátttaka

Yfir 5000 manns hafa hafa tekið þátt í söfnuninni og hafa safnast um níu milljónir króna.

„Það er frábært að finna þennan stuðning frá Íslandi. Hann skiptir miklu máli. Staðan hér er grafalvarleg, börn eru í lífshættu og við getum hjálpað þeim,“ segir Patrick Rose, upplýsingafulltrúi á svæðisskrifstofu UNICEF í Vestur- og Mið-Afríku.

„Við höfum ekki mikinn tíma og verðum að nýta hann vel. Þess vegna skiptir svo miklu máli að fá svona marga í lið með okkur, eins og núna á Íslandi. Framlögin eiga eftir að bjarga lífi barna.“

Neyðarsöfnunin er enn í fullum gangi og er hægt að taka þátt hér á vef UNICEF eða með því að senda sms-ið BARN í númerið 1900 (1000 kr).

Hálf milljón barna í lífshættu

Hálf milljón barna í Nígeríu, Tsjad, Níger og Kamerún er í lífshættu vegna vannæringar. Ástandið í Borno-héraði í norðausturhluta Nígeríu er það slæmt að það kemur meira að segja reyndustu næringarsérfræðingum UNICEF á óvart. Héraðið er á stærð við Ísland og tölur þaðan benda til þess að ástandið jaðri við hungursneyð á ákveðnum stöðum.

„Það er hrollvekjandi því þetta þýðir að mikill fjöldi fólks er í hættu á að deyja beinlínis úr hungri. Við sjáum ekki svona alvarlega stöðu annars staðar í heiminum núna hvað varðar matarskort,“ segir Bergsteinn Jónsson, framkvæmdastjóri UNICEF á Íslandi.

Ástæða neyðarinnar er meðal annars skortur á uppskeru, hækkandi matvælaverð og stórfelldur fólksflótti vegna árása vígahreyfingarinnar Boko Haram.

Börn á aldrinum 6 mánaða til 5 ára eru í mestri hættu. Þar af eru börn 6 mánaða til 2 ára viðkvæmust. Þau eru fyrst til að láta lífið. UNICEF leggur nú allt kapp á að ná til barna sem þjást af vannæringu.