Lögreglan óskar eftir upplýsingum í tengslum við íkveikju í Hafnarfirði

Héraðsdómur Reykjaness úrskuðaði í gær þrjá karla og eina konu í vikulangt gærsluvarðhald á grundvelli rannsóknarhagsmuna að kröfu Lögreglunnar á höfuðborgarsvæðinu.

Fólkið var handtekið í tengslum við rannsókn lögreglu á eldsvoða í Hafnarfirði aðfaranótt þriðjudags. Um klukkan tvö aðfaranótt 1. nóvember varð elds vart í húsnæði að Dalshrauni í Hafnarfirði. Svo virtist sem kveikt hafi verið í húsnæðinu með því að brjóta rúðu og henda þar inn öflugum sprengield, sem sprakk innandyra með þeim afleiðingum að eldur kviknaði og miklar skemmdir urðu á húsnæðinu.

Við rannsókn málsins voru í gær framkvæmdar húsleitir á sjö stöðum og fimm handteknir, allir eru þeir grunaðir um aðild að málinu. Þar af voru fjórir úrskurðaðir í gæsluvarðhald en fimmti maðurinn er laus úr haldi lögreglu. Lögreglan á höfuðborgarsvæðinu naut aðstoða sérsveitar ríkislögreglustjóra við rannsókn málsins.

Rannsóknin hefur leitt í ljós að um klukkan tvö aðfaranótt 1. nóvember síðastliðinn komu tveir menn saman á torfærumótorhjóli að Dalshrauni 11 í Hafnarfirði. Þeir brutu rúðu og hentu þar inn öflugum sprengield, eða tívolíbombu, sem sprakk og eldur varð laus í húsnæðinu. Mennirnir óku brott á hjólinu.

Lögreglan óskar eftir upplýsingum ef einhver hefur orðið var við akstur torfærumótorhjóls í Hafnarfirði eða nágrenni á þeim tíma.

Upplýsingum má koma á framfæri í síma 444 1000 eða í einkaskilaboðum á fésbókarsíðu Lögreglunnar á höfuðborgarsvæðinu.