Freyr: Frammistaðan langt frá okkar besta

„Ég er bara óánægður að tapa, þetta var ekki leikur sem við þurftum að tapa,“ segir Freyr Alexandersson, landsliðsþjálfari íslenska kvennalandsliðsins, eftir að liðið hafði tapað 1-0 fyrir Dönum á Sincere Cup í Kína í dag.

„Það sem skiptir meira máli er að þrátt fyrir að hafa fengið fleiri færi og alls ekki slakari aðilinn í leiknum, þá var frammistaðan okkar langt frá okkar besta. Danirnir voru þreyttir eins og við og leikurinn var á lágu plani hjá báðum liðum.“

Freyr segir að danska liðið hafi tekið betri ákvarðanir í leiknum.

„Við fáum tvö dauðafæri og eigum að gera betur þar. Það er mjög gott að geta verið saman hér í nokkra daga og lært af þessu öllu saman.“

Landsliðsþjálfarinn tekur aftur á móti nokkra jákvæða punkta út úr þessum leik.

„Við vorum að spila á móti liði sem heldur boltanum rosalega vel en við vorum miklu meira með boltann en þær og stjórnuðum leiknum alveg.“