Takmarkanir á verkjalyfjasölu til átján ára og yngri

Apótek í Svíþjóð hafa samþykkt að setja á takmarkanir á verkjalyfjasölu til ungmenna átján ára og yngri. Ungmennin fá héðan í frá ekki að kaupa meira en einn pakka af verkjalyfjum á borð við Panodil, sem er hita- og verkjastillandi.

Ástæðan er grunur um misnotkun á lyfjunum en ungmenni hafa í auknum mæli fengið eitrun vegna ofnotkunar undanfarin misseri. Átján ára og yngri mega ekki kaupa verkjalyf í stórmörkuðum en þrátt fyrir það var talin þörf á að fjarlægja lyf úr hillum verslana á síðasta ári.

Þá fá allir fullorðnir, sem vilja kaupa fleiri en einn pakka af verkjatöflum sem innihalda paracetamol, ráðleggingar frá lyfjafræðingi um hvernig eigi að neyta lyfjanna.