Gríðarlegur viðbúnaður þegar Gnúpur varð vélarvana

Gríðarlegur viðbúnaður var þegar frystitogarinn Gnúpur varð vélarvana skammt frá Dyrhólaey í dag. Tæplega þrjátíu skipverjar voru um borð. Þyrla Landhelgisgæslunnar og björgunarsveitir voru kallaður út.

Það var um klukkan níu í morgun sem að skipverjar á frystitogaranum Gnúp GK-11 höfðu samband við vaktstöð siglinga og óskuðu eftir aðstoð. Togarann Gnúp rak þá stjórnlaust í átt að fjöru skammt vestur af Dyrhólaey. Tuttugu og sjö skipverjar voru um borð. Þyrlu Landhelgisgæslunnar var strax flogið á staðinn og lögregla og björgunarsveitir voru kallaðar út. Fljótlega tókst skipverjum að koma akkeri út og þannig koma í veg fyrir að skipið ræki upp í fjöru. Togarinn Bergey frá Vestmannaeyjum var skammt undan og sigldi strax á staðinn. Vonir stóðu til Bergey gæti dregið Gnúp til Vestmannaeyja. Eftir að búið var að koma taug á milli skipanna tókst skipverjum á Gnúpi að gera við bilun í stjórnbúnaði og koma skipinu aftur í gang.

„Þetta varð ekki eins slæmt eins og haldið var í fyrstu en það var allavega rokið af stað um leið og allir undirbúnir undir það versta,“ segir Walter Ehrat flugstjóri Landhelgisgæslunnar.

„Það var töluverður viðbúnaður,“ segir Sveinn Kristján Rúnarsson yfirlögegluþjónn á Hvolsvelli.

Stefnt var að því í fyrstu að sigla skipinu aftur út á miðin en fljótlega varð þó ljóst að það þarfnaðist viðgerðar og var því siglt til Vestmannaeyja.

Tilviljun réð því að fréttastofa flaug með Landhelgisgæslunni á staðinn. Þegar útkallið kom var fréttastofa að fara að fylgjast með áhöfn hennar afhenda börnum í Garðabæ bangsa fyrir Barnaheill. Verkefnisstjóri Barnaheilla var mættur með bangsann Blæ og tugi hjálparbangsa en allir eru þeir hluti af forvarnarverkefni gegn einelti. Bangsarnir komust hins vegar aldrei um borð í þyrluna þar sem áhöfn hennar þurfti að bregðast hratt við þega tilkynnt var að Gnúpur væri í vanda.

„Það er oft lítið af upplýsingum þegar við leggjum af stað í verkefnin. Við erum ekkert kannski endilega að leitast eftir því heldur bara að komast af stað sem fyrst. Síðan er farið að vinna úr og fá meiri upplýsingar þegar það er búið að leggja af stað,“ segir Walter Ehrat hjá Landhelgisgæslunni.