Fimm milljónir söfnuðust á styrktarkvöldi fyrir Ágústu Örnu

Alls söfnuðust fimm milljónir króna á styrktarkvöldi fyrir Ágústu Örnu, sem lamaðist frá brjósti í slysi á Selfossi nýlega. Talið er að rúmlega 700 manns hafi mætt á styrktarkvöldið en á meðal þeirra sem tróðu upp voru Páll Óskar, Ari Eldjárn, Ágústa Eva og Herbert Guðmundsson.

Boðnar voru upp keppnistreyjur handbolta- og fótboltamanna, málverk, ævintýraferðir og hótelgisting á Suðurlandi, svo fátt eitt sé nefnt.

Treyja Viðars Arnar Kjartanssonar fótboltamanns fór á 250 þúsund krónur, en hann hyggst tvöfalda þá upphæð. Treyja Jóns Daða Böðvarssonar landsliðsmanns í fótbolta fór á 100 þúsund krónur og málverk af Ingólfsfjalli eftir Hall Karl Hinriksson fór á 550 þúsund krónur.

Ágústa Arna féll rúmlega sex metra niður um neyðarop af svölum á vinnustað sínum á Selfossi í ágúst. Hún bæði höfuðkúpubrotnaði og kinnbeinsbrotnaði, og var á gjörgæslu í mikilli lífshættu um tíma.

Þeim sem vilja styrkja Ágústu Örnu er bent á eftirfarandi styrktarreikning:

Rn: 0325-13-110203

Kt: 270486-3209.

Sýnt var frá styrktarkvöldinu í beinni útsendingu í gærkvöldi og er myndskeiðið að finna í spilaranum hér fyrir neðan. Þá var Magnús Hlynur Hreiðarsson fréttamaður á staðnum og tók myndirnar sem sjá má í meðfylgjandi albúmi.