Ástæða til að skoða lóðrétt stjórnskipulag í heilbrigðiskerfinu

Í skýrslu McKinsey & Company um Landspítalann sem kynnt var í síðustu viku er lagt til að stjórnvöld kanni fýsileika þess að koma upp svonefndu lóðréttu stjórnskipulagi í íslensku heilbrigðiskerfi. Um róttæka tillögu er að ræða, en hún felur í sér að Landspítalinn, heilsugæslan, öldrunarþjónustan og heilbrigðisstofnanir á landsbyggðinni lúti einni sameiginlegri stjórn.

Skýrsluhöfundar telja að sökum smæðar landsins ætti slík stjórnun að vera viðráðanleg og auðveld í innleiðingu og skapa ábata fyrir samfélagið.

Bæði Birgir Jakobsson landlæknir og Páll Matthíasson, forstjóri Landspítalans, telja fulla ástæðu til að kanna tillöguna vel, en þeir segjast almennt ánægðir með skýrsluna og tillögur hennar. Að sögn Birgis yrði meiriháttar breyting með lóðréttu stjórnskipulagi sem gæti tekið nokkur ár að framkvæma. Í slíku kerfi vinnur skipulagið út frá starfsemi en ekki stofnunum. „Það er ekki galið að kíkja á þennan möguleika þegar til lengri tíma er litið,“ segir Birgir.

Hann telur skýrsluhöfunda horfa til fyrirmynda í Svíþjóð í þessu sambandi. „Ef við lítum til dæmis á sum landsþing í Svíþjóð sem eru af sömu stærðargráðu hvað varðar fólksfjölda og Ísland þá hafa sum þeirra reynt þessa leið,“ segir Birgir og bendir á góða reynslu heilbrigðisyfirvalda í sænska landsþinginu Östergötland. „Þetta er það landsþing sem kemur hvað best út varðandi gæði og kostnað við heilbrigðisþjónustu.“

Páll segir að lóðrétt stjórnskipulag sé til þess fallið að efla samvinnu milli þjónustusviða í heilbrigðiskerfinu. „Allt það sem bætir samvinnu milli mismunandi þátta heilbrigðiskerfisins er til bóta. Í sumum heilbrigðisumdæmum á Íslandi má segja að sé verulega lóðrétt skipulag vegna þess að þar er á sömu hendi bæði heilsugæsla og sjúkrahús,“ segir Páll og nefnir skipulag Heilbrigðisstofnunar Vesturlands sem dæmi. „Við erum hins vegar lengra frá því að sjá þetta í skipulagi höfuðborgarsvæðisins. Hins vegar er full ástæða til að skoða þetta þar líka,“ bætir hann við segir að nú sé boltinn hjá Landspítalanum, landlækni og heilbrigðisyfirvöldum að vinna tillögur skýrslunnar áfram.

Fréttin birtist fyrst í Fréttablaðinu