Lést eftir að steypuklumpi var varpað fram af brú

Tveir eru slasaðir og einn látinn eftir að steypuklumpi var varpað fram af brú og á bíl við fjónsku hraðbrautina aðfaranótt sunnudags. Ekstra Bladet greinir frá þessu á heimasíðu sinni, en erlend fjölskylda var í bílnum sem var á leið til Jótlands.

Steypuklumpinum var að sögn hent fram af brú sem liggur yfir hraðbrautina við Langesøvej, en faðir, móðir og barn voru í bílnum. Slapp barnið með minniháttar meiðsl, en foreldrarnir voru fluttir mikið slasaðir á sjúkrahús þar sem annað þeirra lést. Meira hefur ekki verið gefið upp um þá slösuðu að svo stöddu, þar sem aðstandendum fjölskyldunnar hefur ekki verið gert viðvart.

Fjónska lögreglan óskar nú eftir vitnum að málinu, í von um að komast til botns um það hver eða hverjir standa á bak við verknaðinn.

Loka þurfti hraðbrautinni um stund, en opnað hefur verið fyrir umferð á ný.