Bráður vatnsskortur ógnar íbúum í Aleppo

Sameinuðu þjóðirnar hafa varað við að um tvær milljónir manna séu nú án aðgangs að hreinu vatni í sýrlensku stórborginni  Aleppo.

Stofnunin skorar á stríðandi fylkingar að leggja niður vopn hið snarasta til að nauðsynlegar viðgerðir geti farið fram í borginni og hjálpargögn flutt þar inn.

Nauðsynlegt er að vinna að viðgerðum á rafmagnskerfi borgarinnar, en stórskemmdir hafa verið unnar á helstu innviðum borgarinnar síðustu vikur, mánuði og ár. Dælustöðvar í borginni eru nú flestar án rafmagns og óstarfhæfar.

Talsmaður UNICEF segir börn vera í sérstakri hættu af því að smitast af sjúkdómum sem ná mikilli útbreiðslu þar sem hiti er mikill og íbúar neyðast til að leita í óhreint vatn.

„Í austurhluta Aleppo eru um 300 þúsund manns, þriðjungur þeirra börn, háð vatni úr brunnum sem mögulega eru mengaðir,“ segir talsmaðurinn Christophe Boulierac.