Þróttur veðjar á þriðja Danann

Þróttur hefur samið við danska miðjumanninn Christian Nikolaj Sørensen um að leika með liðinu út tímabilið.

Sørensen, sem verður 24 ára í næsta mánuði, kemur til Þróttar frá danska 1. deildarliðinu Silkeborg. Hann hefur einnig leikið með Verninge, Sanderum, Næsby og OB á ferlinum.

Sørensen var til reynslu hjá Þrótti í viku og félagið ákvað í kjölfarið að semja við hann. Hjá Þrótti hittir hann fyrir tvo Dani, Sebastian Steve Cann-Svärd og Kristian Larsen, en hvorugur þeirra hefur staðið undir væntingum í sumar.

Þróttur tilkynnti félagaskiptin Sørensen á Instagram en þar kemur fram að félagið muni eflaust bæta fleiri leikmönnum við sig í félagaskiptaglugganum sem opnar á morgun.

Þróttur er í tólfta og neðsta sæti Pepsi-deildar karla með sjö stig eftir 10 umferðir. Þróttarar mæta Víkingum í Víkinni í næsta leik sínum á mánudaginn.

Þróttur hefur undirritað samning út tímabilið við danska miðjumanninn Christian Nikolaj Sørensen, sem kemur til liðsins frá danska 1. deildar liðinu Silkeborg IF. Christian á að baki leiki með U19 og U21 landsliðum Danmerkur. Christian er 23 ára gamall og hefur verið atvinnumaður frá sautján ára aldri. Hann hóf ferilinn hjá Verninge, en hefur einnig spilað hjá Sanderum, Næsby BK og Odense Boldklub. Christian er jafnvígur vinstra megin á miðjunni og sem vinstri vængmaður. ÆTLA AÐ STYRKJA LIÐIÐ ENN FREKAR 'Christian hefur nú þegar lokið vikulöngum reynslutíma hjá okkur og stóð sig afskaplega vel. Hann var meðal annars besti maður vallarins í æfingaleik við topplið í Pepsi um daginn, sem endaði með jafntefli. Christian er sterkur, fljótur og sókndjarfur leikmaður með frábærar sendingar, sem ég tel að muni gagnast okkur vel. Ég vil ekki gefa upp hvort við bætum fleiri mönnum við hópinn, en tel það þó líklegt. Get til dæmis staðfest að við erum bæði að skoða varnarmenn og framherja,“ segir Gregg Ryder þjálfari Þróttar. LÍST VEL Á HJARTAÐ Í REYKJAVÍK 'Ég hlakka til að leggja mitt af mörkum hjá Þrótti. Þetta er félag með langa sögu, mikinn baráttuanda og kallar heimavöll sinn hjartað í Reykjavík. Mér líst vel á þetta allt saman, er hungraður í að spila, ná árangri og sigra. Hjá Þrótti hitti ég fyrir tvo Dani, Kristian Larsen og Sebastian Steve Cann-Svärd, auk þess sem ég þekki fleiri Dani sem spila hér á landi og eru mjög ánægðir. Þannig að það gerir lífið ennþá auðveldara. Þetta á eftir að verða magnað sumar, sérstaklega ef liðið og stuðningsmenn snúa bökum saman,“ segir Christian Nikolaj Sørensen. #lifi #kottarar #hjartaðíreykjavik #fotboltinet

A photo posted by Knattspyrnufélagið Þróttur (@throttur) on Jul 14, 2016 at 9:58am PDT