Segja maðk í mysunni með miða Björns Steinbekk

Ýmislegt bendir til þess að einhverjir íslenskir aðdáendur hafi verið sviknir af Birni Steinbekk með miða á leik Íslands og Frakklands.

Þegar í ljós kom að færri fengu miða en vildu á leik Íslands og Frakklands leituðu margir annarra leiða til að fá miða. Einn þeirra sem hafði milligöngu um miða var Björn Steinbekk. Afhending á miðunum virðist hafa dregist. Tuttugu mínútum fyrir leik mætti blaðamaður Vísis fólki sem var að leita að Birni. 

Inn á hópnum Ferðagrúppa fyrir EM 2016 eru dæmi um fólk sem hafði ekki haft upp á Birni fyrir leik. Einnig ritar þar einn færslu þar sem hann sakar Björn um að selja falsaða miða. Honum og hans hóp hafi í það minnsta ekki verið hleypt inn á völlinn með þá miða.

Vísir náði tali af Birni tæpri klukkustund fyrir leik og þá sagðist hann vera á hlaupum um borgina og hafði ekki tíma til að ræða við blaðamann. Nú, þegar ásakanir um falsaða miða hafa komið upp, næst ekki í Björn. Miðarnir hjá Birni kostuðu frá 43.000 krónum til 67.000 króna. Miðarnir, í gegnum UEFA kostuðu 6.500 krónur til 27.000 krónur.

Uppfært 19.55 Enn aðrir fengu miða sem hleypti þeim inn á völlinn. Þegar þangað var komið er að minnsta kosti einn sem lenti í því að vera umkringdur Frökkum þrátt fyrir að hafa fengið loforð um að lenda með Íslendingum í stúkunni.