Rússar fá aftur að ferðast til Tyrklands

Vladimír Pútín Rússlandsforseti hefur aflétt banni á skipulögðum gamanferðum frá Rússlandi til Tyrklands. Bannið var sett á eftir að Tyrkir skutu niður rússneska orrustuþotu á landamærum Sýrlands og Tyrklands í nóvember.

Pútín setti viðskiptaþvinganir á Tyrki í ársbyrjun og sagðist ekki ætla að aflétta þeim fyrr en hann fengi formlega afsökunarbeiðni frá tyrkneskum stjórnvöldum. Afsökunarbeiðnin barst bréfleiðis í vikunni frá Recep Tayyip Erdogan Tyrklandsforseta. Þjóðhöfðingjarnir tveir ræddust í kjölfarið við símleiðis þar sem Pútín boðaði viðræður um viðskiptasamninga við Tyrki.

Bannið hafði, að sögn tyrkneskra stjórnvalda, skaðleg áhrif á ferðaþjónustuna í landinu, en Tyrkland hefur lengi verið einn vinsælasti áfangastaður Rússa.

Mikil spenna hefur verið í samskiptum ríkjanna síðustu mánuði. Tyrkir hafa ítrekað sakað Rússlandsher um að rjúfa lofthelgi Tyrklands, en Rússlandsher hefur aðstoðað Sýrlandsstjórn í baráttunni við vígamenn Íslamska ríkisins og aðra uppreisnarhópa í Sýrlandi.

Rússar brugðust við með því að koma á viðskiptaþvingunum gegn Tyrkjum og stöðva allt leiguflug í gegnum ferðaskrifstofur frá Rússlandi til tyrkneskra ferðamannastaða.