Alvarlegt ef Strætó fer ekki eftir eigin útboðsreglum

Strætó Bs. er gert að greiða Iceland Excursion Allrahanda ehf. 100 milljónir króna í skaðabætur fyrir að fara ekki eftir eigin útboðsskilmálum. Stjórnarformaður Allrahanda segir það alvarlegt mál ef að byggðasamlög á borð við Strætó fylgi ekki viðurkenndum samkeppnissjónarmiðum.

Þetta er mat Þóris Garðarssonar stjórnarformanns Iceland Excursion Allrahanda ehf. Allrahanda stefndi Strætó vegna niðurstöðu lokaðs útboðs árið 2010 en í niðurstöðu Héraðsdóms Reykjavíkur sem féll á fimmtudaginn er Strætó gert að greiða Allrahanda 100 milljónir króna auk vaxta og málskostnað upp á 7,5 milljónir. Morgunblaðið greinir frá þessu í morgun.

Í útboðslýsingu voru til að mynda settar lágmarkskröfur á gæði strætisvagna sem nota átti en Strætó mun hafa gengist við tilboði Hagvagna hf. sem hafi ekki uppfyllt útboðsskilmála.

Stjórn strætó, sem er mönnuð sveitastjórnarfulltrúum af höfuðborgarsvæðinu, tók ákvörðunina. Allrahanda krafðist mun hærri skaðabóta en fyrirtækinu voru dæmdar að sögn Þóris, en dómnum verður áfrýjað til Hæstaréttar.

„Við erum ósáttir við þessar bætur sem héraðsdómur ákveður. Héraðsdómur ákvað að vísa til hliðar þremur matsgerðum í þessu máli sem hljóða upp á um 500 milljónir króna hver sem er hagnaðurinn sem fyrirtækið verður af vegna þessa verkefnis,“ segir hann.

Hverja telurðu ástæðu þess að Strætó fer ekki eftir eigin reglum?

„Það er þeirra að svara til um það. Þetta er annar dómur sem fellur í málinu varðandi þetta útboð áður hafði Teitur Jónasson farið í mál og þar var staðfest að þeir fóru á svig á lög um útboð. Það sama stendur í þessu máli en þeir verða að svara fyrir það sjálfir afhverju þeir fóru ekki eftir reglum sem þeir sjálfir settu.“

Telurðu það alvarlegt mál að byggðarsamlög á borð við Strætó fari ekki eftir eigin útboðsreglum?

„Það er mjög alvarlegt mál og sérstaklega þegar menn setja sér metnaðarfullar reglur sem er svo ekki farið eftir,“ segir Þórir.