Lífið

Forsetaáskorun Vísis: Vill að Tom Hanks leiki sig í bíómynd um ævi sína

Nanna Elísa Jakobsdóttir og Samúel Karl Ólason skrifa
Guðni Th. Jóhannsson er frambjóðandi til embættis forseta Íslands.
Guðni Th. Jóhannsson er frambjóðandi til embættis forseta Íslands. Vísir

Guðni Th. Jóhannsson sagnfræðingur hefur tvisvar sinnum fengið sekt fyrir of hraðan akstur en segir nú tíma hraðaksturs í sínu lífi liðinn. Hann hefur aldrei reykt en fær sér stundum vín með góðum mat.  

Þetta og fleira kemur fram hér að neðan í svörum Guðna við Forsetaáskorun Vísis.

Vísir leggur mikið upp úr því að umfjöllunin um forsetakosningarnar sé ítarleg og úr öllum áttum, líka skemmtileg. Því lögðum við fyrir alla forsetaframbjóðendur skemmtilegan spurningalista með spurningum af öllu tagi, sumar erfiðari en aðrar en allar í persónulegri kantinum. Vísir mun birta svörin nú í vikunni fyrir kosningarnar sem fram fara 25. júní. Guðni Th. tekur nú við keflinu og gefur lesendum Vísis innsýn inn í sinn hugarheim.

Haltu á ketti! Guðni er kattamaður. Vísir/Getty

Hver er fallegasti staðurinn á Íslandi?
Þessi er alltof erfið. Kannski bara garðurinn heima í góðu veðri, fullur af krökkum og fjöri.

Hundar eða kettir?
Kettir.

Hver er stærsta stundin í lífi þínu?
Fæðingar barnanna minna fimm.

Hver er uppáhaldsmaturinn þinn?
Pönnusteikt bleikja.

Erkitöffarinn Morgan Freeman lék annað aðalhlutverkanna í Shawshank Redemption en það er einmitt uppáhalds mynd Guðna. Vísir/Getty

Hvernig bíl ekur þú?
Toyota Previa 2003.

Besta minningin?
Skemmtilegar stundir með pabba, mömmu og bræðrum mínum. Til dæmis ferðalög um landið að sumarlagi.

Hefur þú verið tekinn af lögreglunni?

Nei, en ég hef tvisvar sinnum fengið sekt fyrir of hraðan akstur. Það kemur ekki fyrir aftur. 

Hverju sérðu mest eftir?
Þegar ég hef sært vini eða ættingja. Og svo voru þessar hraðasektir.

Reykir þú?
Nei, ég hef aldrei reykt.

Uppáhalds drykkur (áfengur)?
Hvítvíns- eða rauðvínsglas með góðum mat.

Uppáhalds bíómynd?
The Shawshank Redemption. 

Uppáhalds tónlistarmaður?
Meðlimir Big Country. Það er skosk hljómsveit.

Hvaða lag kemur þér í gírinn?
Kvaðning með Skálmöld.

Draumaferðalagið?
Fara til Parísar að sjá strákana okkar leika til úrslita í EM!

Guðni segir að það skrýtnasta sem hann hafi gert sé kannski bara að hafa farið í forsetaframboð. Vísir/Guðni

Hefur þú migið í saltan sjó?
Já, heldur betur. Var eitt sumar á fraktskipi og annað á olíuborpalli.

Hvað er það skrýtnasta sem þú hefur gert?

Ja, kannski að fara í forsetaframboð.

Hefur þú viðurkennt mistök?
Já, síðast í þessu viðtali (sjá ofar).

Hverju ertu stoltastur af?
Börnunum mínum.

Rómantískasta augnablik í lífinu?
Líklega þegar Elísa bað mín.

Trúir þú á líf eftir dauðann?
Já.

Ef það væri gerð Hollywood kvikmynd um ævi þína, hver ætti að leika þig?
Tom Hanks gæti eflaust gert það með glæsibrag.


Tengdar fréttir



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.