Hröð fækkun fæðinga á Íslandi áhyggjuefni

Frjósemi Íslendinga hefur minnkað um helming á tæplega sextíu árum. Velferðarráðherra hefur áhyggjur af þróuninni en eins og er viðhalda fæðingar ekki þjóðfélaginu. Breytingar séu að verða á samfélagi og lífstíl ungs fólks.

Frá hruni hefur fæðingum hér á landi fækkað jafnt og þétt. Ísland er á meðal þeirra þriggja aðildarríkja OECD þar sem frjósemi hefur dregist mest saman frá árinu 2008 en hin löndin eru Danmörk og Eistland.

„Það sem við líka sjáum í öðrum löndum sem hafa farið í gegnum sambærilegar kreppur og við, að þá hafa fæðingar tekið við sér þegar efnahagsástand hefur batnað. Hér myndi ég líka hins vegar vilja velta því upp hvort við séum að sjá ákveðnar samfélagsbreytingar hjá ungu fólki," segir Eygló Harðardóttir velferðarráðherra.  

Árið 2014 fæddust 4.363 börn hér á landi. Í fyrra voru þau 4.098 og samkvæmt nýjum tölum Hagstofunnar hafa 980 börn fæðst á fyrsta ársfjórðungi þessa árs. Það er því ljóst að áfram dregur úr frjósemi Íslendinga, sem er nú orðin um helmingi minni en hún var árið 1960. 

„Við viljum auðvitað sjá að það haldi áfram að fæðast hér börn, að Ísland sé fjölskylduvænt samfélag. Við eigum sem stjórnvöld auðvitað að gera okkar til að svo sé. Við höfum séð það líka hvernig þróunin hefur verið í Evrópu og Japan þegar aldurspíramídinn verður mjög skakkur. Mjög stórt hlutfall af þjóðinni er aldraður og fá börn sem fæðast. Það er ekki skemmtileg mynd," segir Eygló. 

Miðað er við 2,1 barn á hverja konu til að viðhalda mannfjölda en árið 2013 lækkaði hlutfallið hér á landi í 1,93. En hvað er hægt að gera til að hvetja fólk til að eignast börn?

„Ég held að hluta til að það sé það sem við erum að tala um, að efla fæðingarorlofskerfið upp á nýtt. Við sjáum það að sum sveitarfélög eru að taka frumkvæði í uppbyggingu á leikskólaplássum til að brúa bilið og það er eitthvað sem er einkar mikilvægt að sé gert. Síðan hef ég náttúrlega lagt gríðarlega áherslu á að við eflum húsnæðismarkaðinn. Það er eitthvað sem skiptir öll börn máli," segir Eygló Harðardóttir.