Formaðurinn um Hemma: Á eftir að kynna mér málið betur

Ásgeir Ásgeirsson, formaður knattspyrnudeildar Fylkis, hefur ekki rætt við Hermann Hreiðarsson vegna atviks sem kom upp eftir leik liðsins gegn ÍBV í gær.

Hermann tók þá Hannes Gústafsson, stjórnarmann ÍBV, hálstaki en Fylkir tapaði leiknum í gær og er enn stigalaus eftir fyrstu fjórar umferðarnar.

Sjá einnig: Hermann tók stjórnarmann ÍBV hálstaki eftir leik: „Þetta lýsir honum vel“

„Ég á eftir að kynna mér málið betur. Ég hef ekki heyrt í Hemma í morgun,“ sagði Ásgeir í samtali við Vísi í dag. „Ég sá þetta áður en ég lagðist á koddann í gærkvöldi. Ég á eftir að heyra í mínum manni.“

Hann segir málið ekki nógu gott. „Þetta er bara leiðinlegt, alla vega eins og þetta lítur út. Ég veit ekki hvað gekk á og held að það sé betra að kynna sér málið betur áður en maður kemur með einhverja sleggjudóma.“

Sjá einnig: Hermann: Nokkrir menn í mínu liði sem líta út eins og frændur sínir

Ásgeir segir fúlt að Fylkir sé enn án stiga en hefur ekki áhyggjur af þjálfaramálunum.

„Við þurfum bara að setjast yfir þetta og finna lausnina. Þessir strákar kunna allir fótbolta. Það er eitthvað sem ekki er að virka og við þurfum að finna lausn á því.“

„Því miður þá þekkjum við þessa rússibanaleið - að byrja illa og koma svo til baka. Þetta er ekki það sem við lögðum upp með.“