Fangelsismálastjóri hefur svarað bréfi umboðsmanns Alþingis vegna kvörtunar fanga á Kvíabryggju

Páll Winkel, fangelsismálastjóri, hefur svarað bréfi umboðsmanns Alþingis vegna kvörtunar sem þrír fangar á Kvíabryggju, þeir Sigurður Einarsson, Ólafur Ólafsson og Magnús Guðmundsson, lögðu inn til umboðsmanns vegna fangelsismálastjóra. Frestur Páls til að svara bréfi umboðsmanns rennur út í dag en í samtali við Vísi kvaðst Páll ekki getað tjáð sig um efni svara sinna og bar við trúnaði.

Tryggvi Gunnarsson, umboðsmaður Alþingis, segir að þeim sem báru fram kvörtunina verði nú gefinn kostur á að gera athugasemdir. Aðspurður hvort bréf fangelsismálastjóra verði birt opinberlega segir Tryggvi að á meðan mál séu til umfjöllunar hjá umboðsmanni í tilefni af kvörtunum þá séu gögn tengd þeim ekki birt. Tryggvi segir að stefnt sé að því að ljúka afgreiðslu málsins eins fljótt og kostur er.

Kvörtuðu yfir komu Michael Moore í fangelsið og ummælum Páls í fjölmiðlum

Kvörtun þremenninganna, sem allir afplána dóma vegna Al Thani-málsins, snerist í grunninn um fjögur atriði: ummæli Páls Winkel í fjölmiðlum um séróskir ónafngreindra fanga og að þeir hafi fengið almannatengslaskrifstofu til að eiga samskipti við fangelsismálayfirvöld, leyfi sem kvikmyndagerðarmaðurinn Michael Moore mun hafa fengið til að mynda og taka viðtöl á Kvíabryggju, tilteknum ummælum í Föstudagsviðtalinu um tilraunir til að múta starfsmönnum fangelsismálastofnunar og að lokum upplýsingum um reiðnámskeið sem aldrei varð.

Sjá einnig: Yfir þessu kvörtuðu Kaupþingsmennirnir þrír

Í bréfi sínu til Páls óskaði umboðsmaður meðal annars eftir því að Páll útskýrði hvað hann átti við í samtali við mbl.is þann 10. október síðastliðinn þegar hann sagði:  

„Það hafa komið fram beiðnir frá ákveðnum föngum um að neyta rauðvíns og annarra áfengra drykkja með mat við sérstök tilefni. Því er að sjálfsögðu neitað.“ Daginn eftir staðfesti fangelsismálastofnun að engin ósk um rauðvínsneyslu hafi borist embættinu frá fanga sem sæti í fangelsi á Kvíabryggju vegna efnahagsbrota frá árinu 2008.

Spyr ítarlega út í reiðnámskeiðið sem aldrei var haldið

Þá vill umboðsmaður einnig vita hvort Michael Moore eða tökulið á hans vegum hafi fengið leyfi stofnunarinnar til að taka upp í fangelsinu og ræða við fanga um þremenningana sem kvörtuðu.

Ef slíkt leyfi hafi verið veitt vill umboðsmaður vita hvernig það samrýmist reglugerðum og stjórnarskrárbundnum rétti fanga til friðhelgi einkalífs. Umboðsmaður vill líka fá að vita hvernig föngum sem voru á Kvíabryggju þegar kvikmyndatökuliðið kom á staðin var kynnt kom þeirra og heimildir til athafna í fangelsinu.

Vísir hefur fjallað ítarlega um reiðnámskeiðið sem stöðvað var á síðustu stundu, samkvæmt Páli sjálfum. Með kvörtun þremenninganna til umboðsmanns fylgdi afrit af tölvupóstsamskiptum Ólafs við forstöðumann Kvíabryggjufangelsisins. Af þeim verður ekki annað ráðið en að Ólafur hafi verið í sambandi við hann frá því í júní um málið.

Umboðsmaður vitnar í tölvupóst frá forstöðumanninum til Ólafs 2. nóvember síðastliðinn þar sem segir að fangelsismálastofnun hafi gefið leyfi fyrir námskeiðinu með tilteknum skilyrðum. Umboðsmaður vill afrit af öllum gögnum stofnunarinnar og fangelsisins sem tengjast þessari reiðnámskeiðsbeiðni fanganna. Þá vill hann líka vita hvort föngunum hafi verið veitt leyfi fyrir námskeiðinu og ef svo er, hvernig ummæli Páls um að það hafi verið stoppað af á síðustu stundu samræmist því.