Undrast að ekki sé leitað besta tilboðs

Árni Páll Árnason, formaður Samfylkingar, undrast að nýtt húsnæði fyrir Stjórnarráðið sé ekki boðið út. Samningsstaða ríkisins sé slæm ef einn aðili er framar í röðinni við að byggja hús fyrir hið opinbera. Málefni lóðarinnar á Hafnartorgi hafa ekki verið rædd innan þingflokks Sjálfstæðisflokksins.

„Það hlýtur að þurfa að leita eftir besta verði í útboði þegar húsnæðis er aflað fyrir Stjórnarráðið. Það gengur ekki að forsætisráðherra geti boðið einhverjum framkvæmdaaðilum lóðir ríkisins, án útboðs eða verðmats, til að fá þá til að hætta við að byggja hús sem ráðherra finnast ljót. Þá eru skattborgarar að greiða peninga til að fegurðarsmekkur forsætisráðherrans skaðist ekki. Í framhaldinu verður þá rakinn gróðavegur fyrir byggingaraðila að koma með vondar teikningar og bíða þess svo að forsætisráðherra banki upp á og gefi þeim ríkiseignir til að fá þá til að hætta við,“ segir Árni.

Sigmundur Davíð Gunnlaugsson forsætisráðherra sagði í viðtali við Stöð 2 á föstudag að verið væri að ræða við einkahlutafélagið Land­stólpa þróunarfélag um makaskipti á lóðum. Ríkið tæki yfir lóðina á Hafnartorgi en Landstólpi eignaðist lóð ríkisins við Skúlagötu. Aftur á móti sagði forsætisráðherra í hádegisfréttum Bylgjunnar daginn eftir að unnið væri að teikningum í samvinnu við eigendur Hafnartorgslóðarinnar.

Brynjar Níelsson, þingmaður Sjálfstæðisflokks, segir málið aldrei hafa verið rætt á þingflokksfundi Sjálfstæðisflokksins og undir það tekur Vilhjálmur Bjarnason, samflokksmaður hans. Brynjar segist ekki hafa nokkurn áhuga á málinu.

Halldóra Vífilsdóttir, forstjóri Framkvæmdasýslu ríkisins, segist ekki geta tjáð sig um málefni Hafnartorgsins þar sem málið sé ekki statt hjá þeim. Framkvæmdasýslu ríkisins er ekki skylt að koma að fyrstu stigum opinberra framkvæmda.

„Samkvæmt lögum þá ber Framkvæmdasýslu ríkisins að hafa umsjón með þriðja stigi opinberra framkvæmda, sem eru verklegar framkvæmdir. Þetta tiltekna mál hefur ekki komið á borð stofnunarinnar. Samkvæmt lögum um skipan opinberra framkvæmda fara verklegar framkvæmdir sömu leiðina, fyrst í frumathugun og áætlunargerð áður en komið er að verklegri framkvæmd,“ segir Halldóra.

Gísli Steinar Gíslason hjá Land­stólpa þróunarfélagi ehf. vildi ekki tjá sig um málið. Sagði hann það í ákveðnum farvegi og á meðan svo væri myndu forsvarsmenn einkahlutafélagsins ekki tjá sig.