Ei­ríkur Ingi deilir við TM um ör­orku­bætur

Eiríkur Ingi Jóhannsson, sjómaður sem öðlaðist landsfrægð þegar hann komst lífs af frá sjóslysi undan ströndum Noregs í janúar fyrir fjórum árum, stendur í stappi við Tryggingamiðstöðina vegna bótauppgjörs.

Upphæðin sem lögmaður Eiríks krefst fyrir hans hönd nemur 13 milljónum króna en deilt er um hvað eigi að miða þegar kemur að bótum vegna örorkunnar. Eiríkur hefur þegar fengið greiddar bætur en eftir stendur fyrrnefnd upphæð.

Segir fjölmörg skýr fordæmi

Jónas Þór Jónasson er lögmaður Eiríks en Hjörleifur Kvaran flytur málið fyrir hönd Tryggingamiðstöðvarinnar. Meginreglan í málum sem þessum er sú að miðað er við meðallaun árin þrjú fyrir slys. Málið flækist hins vegar af þeim sökum að Eiríkur var í námi á þessum tíma og sömuleiðis án vinnu um tíma. Hann nýtti hins vegar tímann til að sækja sér skipstjóraréttindi og var kominn með þau þegar hann lenti í slysinu.

Jónas Þór segir óumdeilt að ekki eigi að miða við árin þrjú á undan, það sé ekki hægt. Það séu þeir Hjörleifur sammála um. Hins vegar er það hvað eigi þá að miða við þar sem hnífurinn stendur í kúnni.

„Þetta er bara eins og ef ég myndi lenda í slysi að loknu fimm ára námi í lögfræði,“ segir Jónas Þór. Fordæmi séu fyrir því bæði úr stétt lögfræðinga og hjúkrunarfræðinga að fólk sem lendi í slysi rétt í þann mund sem það lýkur námi fái greiddar bætur sem miði við meðallaun útskrifaðra úr sömu stétt.

Hjólaði hringinn í kringum landið

„Ef ég slasaði mig og væri að skrifa lokaritgerðina þá fengi ég dæmt miðað við að ég væri lögfræðingur. Það eru mörg fordæmi fyrir því,“ segir Jónas. Hann segist afar hissa á því að Tryggingamiðstöðin sjái þetta ekki sömu augum enda nóg af dómafordæmum.

Hjörleifur segir málið hins vegar ekki svo einfalt. Annars væri ekki verið að deila um það fyrir dómi. Óumdeilt sé að Eiríkur eigi rétt á bótum en deilt sé um viðmið. Málið sé eitt af fjölmörgum af svipuðum toga sem tekist er á um fyrir dómstólum.

Aðalmeðferð í málinu fer fram í mars en málið hefur verið fyrir dómstólum í eitt og hálft ár.

Eiríkur var kosinn maður ársins hjá Reykjavík Síðdegis árið 2012 og hefur síðan meðal annars komist í fréttir þegar hann hjólaði hringinn í kringum landið í WOW-Cyclathon árið 2014. Hann var síðastur í mark en hann hjólaði alla leiðina einn síns liðs. 1332 kílómetra á 77 klukkustundum.

Eiríkur var í ítarlegu viðtali við Fréttablaðið sumarið 2014 þar sem hann sagðist vona að sín yrði ekki minnst sem þess sem datt í sjóinn.