Hvergi fleiri á internetinu en á Íslandi

98 prósent Íslendinga hafa aðgang að internetinu og er það hæsta hlutfall heimsins. Þetta kemur fram í rannsókn breska fyrirtækisins We Are Social. Rétt á hæla okkar koma Bermúda og Noregur með 97 og 96 prósent.

Aftur á móti hafa eingöngu sjö þúsund manns í Norður-Kóreu aðgang að internetinu, sem samsvarar um 0,03 prósentum þjóðarinnar. Rannsóknin nær til landa þar sem íbúar eru 50 þúsund eða fleiri.

Rannsókninni, sem er gerð árlega, er ætlað að varpa ljósi á internetnotkun jarðarbúa. Allt í allt hafa um 3,42 milljarðar manna aðgang að internetinu, sem samsvarar um 46 prósentum. Rétt rúmur helmingur hefur aðgang að farsímum, eða 51 prósent og um 2,3 milljarðar manna eru virkir á samfélagsmiðlum.

Sé litið til netnotkunar á heimsvísu er hlutfall íbúa sem hafa aðgengi að internetinu afgerandi hæst í Norður-Ameríku og Vestur-Evrópu, eða 88 og 83 prósent. Þar á eftir er Eyjaálfa með 68 prósent.