Fá ekki sérgreinalækna á Sjúkrahús Akureyrar

Ekki hefur tekist að ráða sérgreinalækna við sjúkrahúsið á Akureyri. Sjúkrahúsið auglýsti í maí á síðasta ári ellefu sérgreinalæknastöður lausar til umsóknar og nú sjö mánuðum síðar hefur enn ekki verið ráðið í stöðurnar.

Sigurður E. Sigurðsson, framkvæmdastjóri lækninga, segist hafa áhyggjur af stöðunni.

„Við erum ekki búnir að ráða í þessar stöður í sjálfu sér. Við höfum fengið fyrirspurnir um sex stöður og viðræður í gangi við sérgreinalækna um þær. Enn er skortur á læknum og við erum að leita annarra lausna á þeim vanda,“ segir Sigurður. „Til dæmis erum við í samræðum við Landspítalann um að menn komi tímabundið í afleysingar norður. Þannig eru ýmis ráð sem verið er að reyna að nota til að brúa bilið.“

Erfiðleikar við starfsmannahald á sjúkrahúsinu á Akureyri eru ekki nýjar af nálinni. Árið 2011 gerði Ríkisendurskoðun úttekt á starfsemi spítalans. Fram kom í þeirri rannsókn Ríkisendurskoðunar að sjúkrahúsið hefði glímt við skort á læknum sem ekki væri eingöngu tilkominn vegna almenns læknaskorts heldur einnig vegna þess að læknar hefðu hætt á spítalanum vegna óánægju með stjórnun þess.

Talið var að á sumum deildum störfuðu svo fáir læknar að öryggi sjúklinga gæti verið ógnað. Í kjölfarið voru níu ábendingar settar fram í skýrslu. Síðan fór fram mikil vinna innan sjúkrahússins, hjá landlæknisembætti og í ráðuneytinu til að bregðast við ábendingum. Betur má ef duga skal.

Sigurður segir þó skort á sérgreinalæknum ekki hafa áhrif á þjónustustig spítalans og að sjúklingar finni ekki fyrir þessu.

„Þetta hefur fyrst og fremst áhrif á þá sérfræðinga sem eru til staðar hér. Það er meira álag á þeim því vaktir og verkefni dreifast á færri herðar. Það sem við höfum mestar áhyggjur af er að þeir sem fyrir eru þreytist af álaginu. Einnig verðum við líka að manna þessar stöður ef við eigum að geta tekið að okkur aukin verkefni fyrir land og þjóð.“