Öflugur jarðskjálfti reið yfir utan við Fukushima í Japan

Öflugur jarðskjálfti reið yfir utan við strendur Fukushima í Japan nú fyrir skemmstu eða klukkan sex að morgni að staðartíma. Samkvæmt heimildum Bloomberg hefur flóðbylgjuviðvörun verið send út þar sem ölduhæð getur náð upp í allt að þrjá metra. Þá er einnig talin hætta á aurskriðum. 

Staðfest hefur verið að um allt að metra háar öldur séu sjáanlegar við strendur Fukushima. Viðvörun um hugsanlegar stærri öldur er enn í gildi. Fólk á nærliggjandi svæðum er hvatt til að færa sig hærra upp í landið. 

Japanska veðurstofan hefur sagt að jarðskjálftinn hafi mælst 7,4 að stærð. Jarðskjálftinn er sagður hafa verið á allt að 25 kílómetra dýpi . Tveir eftirskjálftar hafa riðið yfir í kjölfarið, annar þeirra mældist 5,4 að stærð en hinn 4,8. Búist er við fleiri eftirskjálftum á næstu klukkustundum. 

Enn er óljóst hve miklar skemmdir hafa orðið af völdum jarðskjálftans en einhverjar fregnir hafa borist um minniháttar meiðsl á fólki.

Töluvert umrót varð við skjálftann í Tókýó, höfuðborg Japans, en þar var fólk hvatt til að yfirgefa tiltekin strandsvæði. Þá á skjálftinn að hafa skokið byggingar í borginni en hún er staðsett um 240 kílómetra suðvestur af skjálftamiðjunni. 

Tónlistarmaðurinn Logi Pedro Stefánsson er staddur í Tókýó og greinir frá því á Twitter síðu sinni að hann hafi fundið fyrir jarðskjálftanum.

Intense jarðskjálfti í Tókýó, allt hristist á hótelinu, fólk farið að öskra frammi á gangi. En allt víst safe núna. https://t.co/g8atsS9eBC

— Logi Pedro (@logifknpedro) November 21, 2016

Fukushima fór illa út úr jarðskjálfta árið 2011

Í mars árið 2011 varð Fukushima  mjög illa úti í kröftugum jarðskjálfta sem mældist 9,0 stig og flóðbylgju sem fylgdi í kjölfarið.

Hátt í 19 þúsund manns létu lífið í flóðbylgjunni sem skolaði heilum bæjum á brott. Enn er leitað líkum að 2.561 manns sem týndust. Þá þurftu um 160 þúsund manns að flýja frá Fukushima kjarnorkuverinu sem varð fyrir verulegum skemmdum vegna flóðbylgjunnar.