Særún Sveinsdóttir látin

Særún Sveinsdóttir Williams lést á heimili sínu í Bandaríkjunum 6. nóvember síðastliðinn 56 ára gömul. Bálför hefur farið fram en minningarathöfn í Hafnarfirði verður auglýst síðar. Særún lætur eftir sig fimm uppkomin börn.

Særún lenti í mjög alvarlegu bílslysi í Omaha í Nebraska í Bandaríkjunum í nóvember 2005. Í slysinu missti hún báða fótleggi fyrir ofan hné. Henni var ekki hugað líf og læknar sögðu kraftaverk að hún hefði lifað slysið af.

Fyrrverandi bekkjarfélagar Særúnar í Öldutúnsskóla efndu til söfnunar til styrktar Særúnar eftir slysið og sagði hún í viðtali við Fréttablaðið ári eftir slysið að það hefði hjálpað henni mikið að vita af baklandi sínu á Íslandi.

Særún festi meðal annars kaup á sérútbúnum bíl eftir slysið en hann gerði henni kleyft að komast allra sinna leiða eftir slysið án aðstoðar. Hún sagði í viðtali við Fréttablaðið á þeim tíma að bíllinn hefði breytt öllu.

„Þetta hefur komið sér svo vel að ég hef grátið yfir því hvað fólk er gott við mig,“ sagði Særún.

„Þetta sýnir hvernig Íslendingar eru. Þeir hugsa um sína hvort heldur er nær eða fjær. Ég get aldrei þakkað þessu yndislega fólki nógsamlega fyrir allar þær velfarnaðaróskir, velvilja og stuðning, sem ég hef fengið. Með aðstoðinni hef ég getað greitt niður skuldir mínar, borgað húsaleiguna og staðið undir fleiri útgjöldum sem ella hefðu reynst mér óyfirstíganlegur hjalli.“