Hjólakeppni við allra hæfi

„Við ætlum að bjóða upp á vegalengdir fyrir alla aldurshópa og öll getustig, alveg frá tveggja kílómetra barnabraut og upp í 110 km alvöru hjólakeppni,“ lýsir Kjartan Ásmundsson hjá Íþróttabandalagi Reykjavíkur en ÍBR stendur fyrir Tour of Reykjavík sem haldin verður í fyrsta sinn á sunnudaginn.

„Við höfum litið á Reykjavíkur­maraþonið sem fyrirmynd í skipulagningunni,“ segir Kjartan og bætir við að brotið verði blað í lokunum vega. „Þá munu öryggis­bílar, lögreglan, dómarabílar og aðrir þjónustubílar fylgja hjólreiðafólki í lengstu vegalengdunum.“

Barnabraut og þrautabraut

Boðið verður upp á fjórar mismunandi vegalengdir. Hjólakraftur heldur utan um þá stystu, barnabrautina sem verður tveggja kílómetra hringur í Laugardalnum. Hjólaleiðin á að henta börnum frá fjögurra til tólf ára en þó er vissara að þau yngstu séu í fylgd fullorðinna. Engin tímataka er í þessari vegalengd og engin verðlaun önnur en ánægjan. Ræst verður kl. 14 frá Laugardalshöll.

Það verður ýmislegt gert til að gera viðburðinn sem skemmtilegastan fyrir krakkana að sögn Þorvalds Daníelssonar hjá Hjólakrafti. „Latibær verður á staðnum og ýmis tónlistaratriði í gangi. Þá munum við verða með glænýja 50 metra langa braut með hólum og hæðum sem krakkarnir mega leika sér í á hjólum, hjólabrettum eða hlaupahjólum. Þá verða BMX-gaurarnir á svæðinu og leika listir sínar,“ segir hann. 

Öllum þátttakendum barnabrautarinnar verður boðið upp á djús og í Laugardalslaugina að viðburði loknum.

Hjólað á lokuðum götum

Boðið verður upp á 13 km borgarhring á lokuðum götum. „Þar geta allir tekið þátt, jafnvel þótt þeir hafi ekki stigið á hjólið í mörg ár,“ segir Kjartan. Hringurinn liggur frá Laugardalnum, um Skeifuna, Bústaðaveg, Hringbraut, niður í miðborgina og þaðan til baka Sæbraut og inn í Laugardal. Virk tímataka verður í boði svo þátttakendur fái staðfestan tíma en ekki verða veitt nein verðlaun. „Þetta er skemmtileg vegalengd fyrir fjölskylduna að fara saman.“

Næsta vegalengd sem fólk getur valið er 40 km en þá eru farnir þrír hringir eftir 13 km löngu brautinni. „Þetta er aðeins meiri keppni og verðlaun veitt í nokkrum aldursflokkum. Almenningur er líka hvattur til að mæta enda eru 40 km ekki svo löng leið á flatri braut,“ segir Kjartan og bendir á að krakkar niður í tólf ára geti tekið þátt.

110 km hjólakeppni

Aðalkeppni Tour of Reykjavík er 110 km hringur. „Hjóluð verður falleg og krefjandi leið frá Laugar­dalnum til Þingvalla um Nesjavallaleið. Farið um Grafning og Mosfellsheiði til baka, fram hjá Hörpu og endað í Laugardalnum. Þetta er keppni fyrir lengra komna og er bæði liða- og einstaklingskeppni,“ segir Kjartan. Búist er við harðri keppni og þegar eru búnir að skrá sig mjög sterkir erlendir keppendur að sögn Kjartans.

Skráning fer fram á www.tourofreykjavik.is til klukkan 23 á föstudag en einnig er hægt að skrá sig í Laugardalshöllinni milli 12 og 15 á laugardaginn en þar fer einnig afhending skráningarganga fram.