Vilja efla eðlilegar fæðingar

„Mitt verkefni snýst um að við breytum aðeins hugarfarinu frá því sem nú er, með því að styðja betur við það eðlilega ferli sem meðganga og fæðing er. Við leggjum stöðugt meiri áherslu á aukna tækni en ég tel að ljósmæður gætu þess í stað veitt meiri fræðslu,“? segir Emma Marie Swift ljósmóðir.

Hún hlaut nýlega styrk úr Minningarsjóði Bjargar Magnúsdóttur ljósmóður og Magnúsar Jónassonar bónda til að sinna doktorsverkefni sínu.

„Það gengur út á að þróa hópmeðgönguvernd á höfuðborgarsvæðinu og skoða í framhaldinu hvort mæðrum falli hún betur í geð en sú sem nú er við lýði. Hugsanlega er of lítill tími ætlaður til andlegs stuðnings því stöðugildum hefur fækkað á heilsugæslustöðvum og það kemur niður á ýmsu. Ég tel að við getum gert betur innan þess ramma sem við höfum með því að hópa konum meira saman. Í stað þess að hver og ein fái 15 mínútur fær hún kannski einn og hálfan tíma, ásamt fleirum.“

Auk Emmu Marie hlaut Valgerður Lísa Sigurðardóttir ljósmóðir styrk úr ofangreindum minningarsjóði. 

Hennar rannsókn snýst um hvort margar íslenskar mæður upplifi fæðingar sem neikvæða reynslu sem hafi langvarandi áhrif á þær og samband þeirra við barnið. Segir slíkar rannsóknir hafa verið gerðar erlendis og þær sýni að 1-6% kvenna þrói með sér áfallastreituröskun eftir fæðingar. 

„Hér á landi eru samtök sem nefnast Ljáðu mér eyra og hafa það að markmiði að hjálpa konum sem finna fyrir fæðingarþunglyndi. Ég hyggst meðal annars hafa samband við konur sem hafa hlotið þjónustu þessara samtaka til að athuga hvað hefur hjálpað þeim og hvað þær telji betur mega fara.“