Daprasti ísbjörn heimsins dauður

Arturo, „heimsins daprasti“ ísbjörn, er allur. Hann var 30 ára gamall og eini ísbjörn Argentínu en Arturo vakti heimsathygli fyrir tveimur árum þegar dýraverndunarsinnar skoruðu á forsvarsmenn Mendoza dýragarðsins og forseta Argentínu að send Arturo í dýragarð í Kanada.

Tveimur árum áður hafði maki Arturo drepist vegna krabbameins og er ísbjörninn sagður hafa þjáðst af þunglyndi frá því. Þá fer hitinn í dýragarðinum reglulega yfir 40 gráður en laugin í búri Arturo var einungis um 40 sentímetra djúp og starfsfólk í garðinum þarf að halda henni kaldri með því að varpa stærðarinnar ísmolum í hana með reglulegu millibili.

Samkvæmt BBC var Mendoza dýragarðinum lokað í síðasta mánuði eftir að rúmlega 60 dýr höfðu drepist á undanförnum mánuðum. Embættismenn sögðu að dýrin hefði verið of mörg og að þau hefðu drepist vegna sjúkdóma.

Arturo var orðinn blindur á öðru auganu og lyktarskyn hans var nánast ekkert. Vegna aldurs var hann orðinn verulega veikur og samkvæmt dýragarðinum stóð til að svæfa hann áður en hann dó.