LSD neysla áhyggjuefni

Það er áhyggjuefni ef ungt fólk er í auknum mæli farið að neyta ofskynjunarlyfsins LSD eins og vísbendingar eru um. Þetta segir yfirlæknir á Vogi sem segir sérstaklega varasamt ef lyfið er sagt hættulaust sem það er alls ekki.

Ungt fólk sem á enga sögu um eiturlyfjaneyslu er í auknum mæli farið að koma við sögu lögreglu vegna neyslu á ofskynjunarlyfinu LSD. Runólfur Þórhallsson, yfirmaður fíkniefnadeildar lögreglunnar, sagði á dögunum að svo virtist sem verið væri að markaðssetja LSD sem hættulaust ferðalag.

Valgerður Rúnarsdóttir, yfirlæknir á vogi segist þessa þróun vera áhyggjuefni.

„Það er auðvitað áhyggjuefni. Þetta getur verið hættulegt fyrir hvern sem er að taka það. Sérstaklega ef þetta er selt sem saklaust efni sem það er auðvitað ekki.“ Segir Valgerður.

Hún segir LSD gjarnan hafa verið notað með öðrum vímuefnum í gegnum tíðina en segist ekki hafa merkt aukningu í innlögnum á Vog vegna LSD notkunar einnar og sér.

„Það eru margir að tala um það í dag að þeir séu að nota þetta með af þeim sem koma hingað í meðferð. Þeir koma kannski ekki hingað út af þessari neyslu eingöngu eða fyrst og fremst en þetta er notað með. Þessi efni geta verið hættuleg geðheilsunni sérstaklega. Þetta getur orðið það alvarlegt líka að fólk fari hreinlega í hræðslukast eða fái aðsóknarhugmyndir. Það getur verið býsna svæsið fyrir einstaklinginn að lenda í því.“

Ungt fólk er sérstaklega viðkvæmt fyrir neyslu á LSD.

 „Ungur heili, alveg sama hvaða vímuefni er notað, hann er viðkvæmastur því það eru miklar breytingar í heilanum hjá ungu fólki. Hann er að þroskast og breytast mikið. Þessi hópur er náttúrulega tilraunahópur og er hvatvís oft og er til í að gera og prófa ýmislegt. Það er getur verið svolítið hættulegt að taka svona áhættur.“