Sósíal drama með dansívafi

Þær eru báðar fyrrverandi íslandsmeistarar í freestyle og báðar leikkonur. Við sátum einhvern tíma fjögur á Snaps og vorum að tala um gömlu, góðu dagana. Þær voru að rifja upp freestyle-árin og þá kviknaði þessi hugmynd, að þetta væri góður vettvangur til þess að segja sögu og gera sjónvarp. Þannig að þær eiga nú eiginleg heiðurinn af þessu og fá hugsanlega hlutverk að launum, núna sem dansmömmur,“ segir leikstjórinn og handritshöfundurinn Kristófer Dignus.

Kvartettinn sem um ræðir er auk hans skipaður Reyni Lyngdal leikstjóra og eiginkonum þeirra, leikkonunum og freestyle-meisturunum Maríu Hebu Þorkelsdóttur og Elmu Lísu Gunnarsdóttur.

Upprifjunin á gömlu, góðu dögunum varð kveikjan að átta þátta sjónvarpsseríunni Frístæl sem nú standa yfir handritaskrif á. Sögusvið hennar er Reykjavík árið 1986 og er hringamiðjan Tónabær og freestyle-danskeppnirnar sem áttu hug og hjörtu unglinga þess tíma. Þættirnir segja frá tveimur viljasterkum táningsstúlkum með ólíkan bakgrunn sem berjast um titilinn frí­stælmeistari Íslands. Á meðan heyja foreldrar þeirra sína eigin baráttu við syndir fortíðarinnar.

„Það er söguheimurinn. Og svo þetta hvernig það var að vera unglingur á þessu tímabili í Reykjavík í skugga kalda stríðsins, verkfalla hjá kennurum og alls þess. Þetta er svona sósíal drama með dansívafi,“ segir Kristófer og skellir upp úr. „Ég er búin að liggja svolítið í safni Sjónvarpsins. Þeir eru með þætti frá þessu tímabili og danskeppnirnar eru til hjá þeim,“ segir Kristófer meðal annars um heimildarvinnuna fyrir þættina og auðheyrt er að hann er orðinn spreng­lærður í freestyle-fræðum. Þættirnir hlutu þróunarstyrk frá RÚV og handritsstyrk frá Kvikmyndasjóðnum.

Vinna við handritsgerð er nú á fullri fart. Kristófer er aðalhandritshöfundur en með honum skrifa þau Dagur Hjartarson, Jónas Reynir Gunnarsson og Anna Gunndís Guðmundsdóttir. Reynir Lyngdal mun leikstýra þáttunum og þeir verða framleiddir af Pegasus.

„Ég er með þau þrjú með mér og það er rosalega gaman hjá þér. Ég er svona gamli karlinn og var sextán ára þegar þetta var allt að gerast. Ég man nokkurn veginn hvernig stemningin var þannig að ég kem svona með nostalgíuvinkilinn og svo eru þau alveg ógeðslega góð í að koma með skemmtilega karaktera og flottar fléttur. Við erum að búa til skemmtilegt sjóv sem á að brúa kynslóðabilið og kveikja líka áhuga hjá unga fólkinu.“ 

Greinin birtist fyrst í Fréttablaðinu 6. september.