Þáttastjórnandi Rásar 2 minnti fólk í Vestmannaeyjum á að nauðga heima hjá sér

„Minnum fólk á að nauðga bara heima hjá sér í Vestmannaeyjum,“ sagði Margrét Erla Maack, útvarpskona, í lok Morgunútvarpsins á Rás 2 í morgun þegar þáttastjórnendur kynntu inn Þjóðhátíðarlagið 2016.

Hér má heyra ummælin en þau eru í lok þáttarins eftir klukkustund og 37 mínútur.

Fór um aðra í hljóðveri þegar Margrét lét orðin falla og heyrðist í einum segja „Oj, bara“ þegar tónar Þjóðhátíðarlagsins tóku að heyrast í útvarpinu.

Margrét Erla var gagnrýnd fyrir ummælin á Facebook og þar vísar hún í Twitter-færslu rithöfundarins Dags Hjartarsonar sem spyr hvort slagorð Þjóðhátíðar í ár verði: „Naugðum inni.“

Er slagorð Þjóðhátíðar 'Nauðgum inni“? Gefum Páleyju orðið: pic.twitter.com/2GC22FDZFO

— Dagur Hjartarson (@DagurHjartarson) July 19, 2016

Tilefni tístsins eru orð Páleyjar Borgþórsdóttur, lögreglustjóra í Vestmannaeyjum, í kvöldfréttum Stöðvar 2 í gær, en fréttina má sjá hér að neðan.

„Flest þessara brota eiga sér stað á milli tveggja einstaklinga í lokuðum rýmum þangað sem fólk fer yfirleitt sjálfviljugt. Það er bara staðreyndin,“ sagði Páley í fréttum Stöðvar 2 í gær.

Páley hefur verið gagnrýnd mjög fyrir þessi orð og fyrir þá ákvörðun að banna lögregluyfirvöldum og öðrum að tjá sig um kynferðisbrot sem gætu orðið á Þjóðhátíð í ár. Þessi hátturinn var einnig hafður á í fyrra.

Til að mynda skrifaði Fanney Birna Jónsdóttir, aðstoðarritstjóri 365, í leiðara Fréttablaðsins í dag að þessi viðhorf hæfðu ekki 21. öldinni. 

„Þessi rök halda ekki heldur vatni. Þegar tugþúsundir safnast saman er hægara sagt en gert að leggja saman tvo og tvo til að finna út málsaðila. Það að fólk fari sjálfviljugt inn í lokuð rými, það séu einungis tveir til frásagnar eða að fólk þekkist er hins vegar gömul tugga sem gengur út á að fórnarlambið beri ábyrgð á glæpnum. Röksemd sem ætti ekki að sjást á 21. Öldinni,“ skrifaði Fanney og spurði hvort hagsmunir fórnarlamba væru raunverulega ástæðan fyrir ákvörðun lögreglustjórans. 

„..eða hvort hann sé raunverulega að reyna að tryggja að skuggi falli ekki á Þjóðhátíð á meðan á henni stendur. Það er í sjálfu sér ekki nýtt af nálinni. Sem dæmi má nefna að bæði kaþólska kirkjan og BBC hafa verið staðin að því að þagga niður umfjöllun um kynferðisbrot innan sinna raða til að viðhalda jákvæðri ímynd.“ 

Margrét Erla hefur verið áberandi í myndböndum Druslugöngunnar sem gengin verður um helgina en gangan gengur út á að skila skömminni sem þolendur upplifa gjarnan eftir að brotið hefur verið á þeim kynferðislega til gerenda. 

Margrét steig fram í einu myndbandanna og sagði frá eigin nauðgun. 

Margrét vísar í myndbandið hér að neðan á Facebook þar sem hún er spurð út í ummælin með eftirfarandi útskýringu: 

„Ég viðurkenni það að kaldhæðni skilar sér sjaldan í útvarpi. Mér er einfaldlega nóg boðið, eins og svo mörgum öðrum, meðal annars ríkislögreglustjóra, hvernig tekið er á þessum málum í Vestmannaeyjum.

Tímaskekkja og rugl. Þetta var kaldhæðnisleg athugasemd um ljótan veruleika og ég er glöð að við séum öll sammála um að þetta hafi farið yfir strikið. Ekki reyna að misskilja mig að ég sé að hvetja til nauðgana. Stundum er ég grimmur gargandi háðsfugl.

Nauðganir eru svartur blettur á hátíð sem ég efast ekki um að sé frábær þar sem kærleikurinn er í fyrirrúmi. Afsakið,“ skrifaði Margrét.