Ramsey: Verðum að nýta færin gegn Barcelona

Aaron Ramsey og Per Mertesacker, leikmenn Arsenal, voru sammála um að enska liðið gat sjálfum sér um kennt hvernig fór fyrir því gegn Barcelona í Meistaradeild Evrópu í kvöld.

„Við stóðum okkur virkilega vel í fyrriu hálfleik og náðum að búa til nokkur færi gegn þeim,“ sagði Ramsey eftir leikinn í kvöld.

„Þetta verður erfitt fyrir okkur núna en við ætlum að fara og gera okkar besta. En það er alveg ljóst að maður verður að nýta færin sem maður fær gegn liði eins og þessu.“

Sjá einnig: Messi sá um Arsenal | Sjáðu mörkin

Mertesacker tók í svipaðan streng. „Við urðum að skora í þessum leik og þess vegna áttum við ekkert skilið. Það er ekki hægt að halda þessu liði niðri í 90 mínútur.“

„Við tókum meiri áhættur í okkar leik og þeir skoruðu. Við fengum færi til að skora að minnsta kosti eitt mark.“

„Við verðum að einbeita okkur að deildinni núna. Eftir einn mánuð spilum við gegn Barcelona og við eigum enn möguleika. Við munum aldrei gefast upp.“