Unglingar erlendra foreldra líklegari til að neyta vímuefna

„Niðurstöður síðustu fyrirlagningar sýna greinilega að unglingar sem eiga foreldra sem eru af erlendum uppruna eru miklum mun líklegri til að reykja, drekka áfengi eða nota ólögleg vímuefni en jafnaldrar þeirra,“ segir Ársæll Már Arnarsson, prófessor í sálfræði við Háskólann á Akureyri og stjórnandi ESPAD-rannsóknarinnar hér á landi.

„Þannig hafa 33 prósent unglinga sem eiga báða foreldra af erlendu bergi brotna einhvern tíma reykt sígarettur, samanborið við 23 prósent þeirra þar sem annað foreldrið er erlent og 14 prósent þeirra sem eiga íslenska foreldra.“

Þetta kemur fram í Evrópsku vímuefnarannsókninni, ESPAD, hér á landi. Háskólinn á Akureyri hefur umsjón með rannsókninni sem er lögð fyrir alla nemendur í tíunda bekk. 

Þá hafa 57 prósent unglinga erlendra foreldra neytt áfengis um ævina samanborið við 32 prósent unglinga íslenskra foreldra.

Enn fremur tekur rannsóknin á viðhorfi unglinga til skaðsemi vímuefna. Í þeim gögnum má sjá að unglingar sem eiga foreldra sem eru af erlendu bergi brotnir eru mun líklegri til að líta vímuefni jákvæðum augum. 

Til að mynda telja 18 prósent unglinga sem eiga erlenda foreldra að einn pakki af sígarettum á dag sé fólki ekki skaðlegur á móti fjórum prósentum barna sem eiga íslenska foreldra. Svipaða sögu er að segja um áfengi og kannabisefni.

„Sennilega spila margir þættir inn í, sálfræðilegir, efnahagslegir og menningarlegir,“ segir Ársæll.

„Það getur verið að hluti þessara unglinga upplifi sig utangarðs, en þegar viðhorf þeirra til skaðsemi vímuefna er skoðuð vaknar einnig spurning um það hvort þær forvarnaraðferðir sem reynst hafa svo vel fyrir aðra henti þessum hóp ekki eins vel. Þá er ekki ólíklegt að foreldrar þeirra hafi önnur viðhorf en almennt tíðkast meðal innfæddra Íslendinga. Þetta er vitanlega fjölbreytilegur hópur og líklega liggja margvíslegar ástæður að baki þessu og ólíklegt að einhver ein aðferð dugi til að draga úr vímuefnanotkun hans,“ segir hann.

Ársæll segir að Íslendingar hafi ekki veitt heilsufari og þörfum innflytjenda nægjanlega athygli. Aðkallandi sé að efla rannsóknir á þessu sviði, efla forvarnir og fjölmenningarþekkingu þeirra sem vinna að forvörnum auk þess sem það sé mikilvægt að ná til foreldra unglinganna.