Faldi muni úr tunglferðinni

Geimfarinn Neil Armstrong hafði falið muni úr Apollo 11 á heimili sínu. Enginn vissi af mununum, ekki einu sinni, eiginkona hans, sem fann þá falda í skápnum hans. Hún fann hvítan poka sem meðal annars innihélt myndavélina sem fangaði lendingu geimfarsins á tunglinu.

Munirnir hafa nú verið lánaðir til Smithsonian safnsins.

Á vef NASA segir að munirnir hafi einstakt sögulegt gildi og þar má einnig sjá um hvaða muni er að ræða og hvert hlutverk þeirra var í geimferðinni.

Neil Armstrong dó í ágúst 2012, þá 82 ára gamall og var hann fyrsti maðurinn til að ganga á tunglinu. Í júlí 1969 lenti hann á tunglinu með Buzz Aldrin, en þriðji geimfari Apollo 11, Michael Collins var áfram á sporbraut um tunglið.